Sarawak ulih belajarka chara betanam vertikal Singapura, ngangkatka produktiviti
Sapit Premier Sarawak Datuk Amar Douglas Uggah Embas madahka Sarawak ulih belajarka chara betanam betupi vertikal ke dikemeranka Singapura dalam pengawa ngangkatka kualiti enggau produktiviti asil betanam betupi nengeri.
Betanam betupi vertikal tu iya nya pengawa betanam utai tanam ba lapis ti berurun enggau chara vertikal.
Tu suah ngempungka pengawa betanam ba palan ti dijaga, tuju nentuka enggau optimum pengalak utai tanam sereta mega chara betanam ti enda ngena tanah baka hidroponik, akuaponik enggau aeroponik.
“Pengawa btanam vertikal tu Singapura iya nya sebagi ari inovasyen ti endang ngemegahka.
“Betanam enggau chara moden tu iya nya sebagi ari bidang ke alai Sarawak ulih belajar ari republik nya,” ku iya lebuh ti nerima penemuai meri basa ari Pesuruhjaya Tinggi Singapura ke Malaysia Vanu Gopala Menon di opis iya kilah ensana.
Uggah madah, inovasyen tu iya nya ngena teknologi moden dikena nyaga rampa menua endur betanam.
Berindik ari tu, iya pechaya chara betanam tu endang engkeman enggau pengerembai baru sereta matak kelebih agi bala pekebun biak ti bisi pelajar di kandang mengeri.
“Kamidekanentukamayuh agi raban nembiak ngerejaka pengawa betanam moden nyadika profesyen, lalu enggau tu ulih ngangkatka tikas pemansut pemakai enggau produk pemakai,” ku iya.
Beserimbaienggautu,Uggah madah, Sarawak diatu mekuh ngagai pengawa ngemansutka mayuh agi berau lalu tu iya nya siti ari penguji ke baru.
“Opis Menteri Industri Pemakai, Komiditi enggau Pemansang Wilayah kitai ngeletakka juluk tikas 60 peratus penatai pemisi ngemansutka padi datai ba taun 2030. Nya alai pengawa ngemansutka berau tu dikemeratka perintah.
“Kami ngarap ulih nguna chara mutarka teknologi baka
ngena dron dalam pengawa manchit baja enggau rachun indu utai kelimpah dikena matau.
“Nya alai, bisi pematut dalam nguna igi benih hibrid asil ti tinggi enggau chara ngetau mekanikal,” ku iya.
Uggah mega nambah, lebuh sida ti bumai ngetau asil ti mayuh, penatai pemisi sida mega ulih betambah.
Ku iya madah, taja pan Sarawak udah ditukuka nengeri ti bepenatai pemisi tinggi, tang agi bisi rayat di ngembuan penatai pemisi ke baruh tauka mit.
“Nya alai enggau mantu raban tu ngangkatka penatai pemisi sida mega (inisiatif) ke endang beguna ngagai perintah,” ku iya.