Penanggul apat, repik kayu di Sg Katibas ukai ari aktiviti kereja batang: Hamden
Direktor Opis Kampung Sarawak Datu Hamden Mohammad madahka penanggul apat enggau repik kayu ti anyut di Sungai Katibas enggau Sungai Rajang, Song ukai ketegal aktiviti kereja batang.
Bepelasarka pekara ti udah dulu ditemu raban opis iya ke dianjung ngabas penanggul nya, iya madahka, kediatu kebuah penanggul apat enggau repik kayu ti anyut di sungai nya ketegal ujan bangat ti nyadi di Tadahan Ulu Katibas.
Nitihka iya, bepelasarka data satelit kena 3 Mac, bisi ngayanka urung 10 alai tanah tusur udah nyadi di dalam kandang endur Tadahan Ulu Katibas.
“Naka kediatu, nadai aktiviti kereja batang dipejalaika di kandang endur Taman Hidupan Liar Lanjak Entimau tu. Kandang endur tu endang Totally Protected Area (TPA), Taman Hidupan Liar Lanjak Entimau tu jaun din di ulu Sungai Batang Katibas.
“Asil pansik ti ipejalaika ngena satelit, raban kami nganjung pesawat, sereta kami bisi gambar lalu bepelasarka semua gambar imej nya kami bisi tetemuka ambis kurang 10 tanah tusur di kandang endur nyaga jelu siga Lanjak Entimau.
“Enti bepelasarka data enggau hirdologi ari Jabatan Pengairan dan Saliran (JPS), intensiti ujan ba endur nya lebih mayuh agi nyadi di kandang endur tadahan ti lalu ulih ngujungka tanah tusur di sepemanjai Sungai Nyawai, Sungai Takai enggau Sungai Kalimau Besai ti bisi dalam Tadahan Ulu Katibas,” ku iya.
Iya dirandau raban pengarang berita pengudah ngulu pengawa bejadi Persidangan Antarabangsa Pengurusan Mampan Hutan Tropika, ti diatur Gerempung Kayu Ramu Sarawak ba sebuah hotel ditu, kemari.
Bejaku baru, iya madah diri enda ngenggaika bisi aktiviti kereja batang tang kereja batang nya dipejalaika ngena chara sistematik.
Nya alai dipelabaka penanggul ke nyadi nya naka kediatu ukai ketegal kereja batang tang tu tasah tauka resa asal, ku iya.
“Nya kebuah aku enda meri penerang dalam timpuh
sehari tauka dua hari maya pekara tu nyadi. Kami patut ngiga nama pekara ti nyadi, lalu nya meih pekara ti ditemu kitai naka ke diatu, tang raban kami agi matau din nentuka nama pekara ke amat nyadi sebendau ngeluarka sebarang penerang,” ku iya.
Berebak enggau tu Hamden mega madahka opis iya enda bejalaika inisiatif ngengkahka ‘Log Boom’ baka ti kala dipejalaika di Baleh beberapa taun sebedau tu.
Di Sungai Baleh ku ya bisi empat iti ‘Log Boom’ dipasang sereta ke siti kereban nya berega RM1 juta.
“Nya alai ungkup Batang Rajang kami enda masang nya laban kebendar ia enda ulih dipejalaika. Repik kayu nya diasuh anyut ke tasik kelimpah ari enti bisi batang besai baru diperesi sereta minta lisin dulu,” ku iya.