STA ngarapka pengemeran industri ti nentuka FMU diaku terus disukung
Gerempung Kayu Ramu Sarawak (STA) ngapil ngagai raban autoriti tauka pengaga polisi meri sukung penuh ngagai pengemeran industri ti udah bebendar dalam nentuka Forest Management Units (FMU) diaku kena Forest Management Certification (FMC).
Chairman gerempung nya, Dato Henry Lau madahka, laban deka bulih status pensijilan nya pengemeran industri kayu ramu betapi mayuh penguji.
Ku iya, deka ngatur FMC ba FMU sereta enti terus ngemeranka nya ulih ngujungka proses ia panjai, ngasuh leju enggau mar.
“Nya alai, STA enggau lengkas ngapil ngagai autoriti tauka pengaga polisi ti bekaul ngambika terus meri sukung penuh ngagai pengemeran industri ti udah berkorban besar dalam nentuka FMU diaku kena FMC.
“Tu nengah pengawa nyendiaka polisi timpuh panjai ti telus, komsisten, meruan enggai tegap, kelebih agi bekaul enggau atur sereta chukai perintah, lesen enggau timpuh panjai meruan ti bekaul.
“Sukung ti baka nya udah tentu deka meri pengarap
dalam industri kayu ramu sereta ti beguna kena nempa penumbuh ti enda ngetu enggau meransang komitmen industri kena terus ngemeranka SFM enggau nguntungka juluk dalam rampa menua ba timpuh panjai,” ku iya.
Iya madahka pekara nya lebuh bejaku ba Persidangan Antarabangsa Pengurusan Mampan Hutan Tropika, STA ti diatur ba sebuah hotel ditu, kemari.
Bejaku baru iya madahka industri enda ulih dikearapka nyendiaka sempekat penyaga, ti polisi berubah enggau limpang ari prinsip ti ditetapka.
“Kebendar, nama kebuah semina pengemeran kayu ramu aja ti nanggung pekara bekaul enggau SFM? Ukai
ti patut NGO, perintah dua bengkah menua penguna enggau pengeluar, pemegai taruh bukai ti lain ari sukut ekonomi, rama enggau rampa menua mega diungkup patut bisi pensijilan pemeruan dalam prinsip, polisi, tadbir urus enggau chara operasyen sida?,” ku iya.
Kelimpah ari nya iya madahka industri kayu ramu mega betapi enggau penguji dalam nentuka pengawa nitihka mayuh undang-undang ti diteritka menua penguna.
Ku iya, definisyen, atur enggau peminta ti enda konsisten tauka enda tetap ari menua penguna nya ukai semina nagang tauka muntanka pengawa dagang tang mega ngasuh saru enggau enda konsisten dalam pengawa kerejasama antarabansa.
“Landskap pengatur ti tusah tauka bebalut tu sereta ditambah agi enggau peminta ba ungkup sumber tambah enggau capacity building, tu terang amat nambahka tating ba ungkus ngagai menua pengeluar kayu ramu.
“Penguji tu, taja pan beguna, semina sebagi ari penguji tauka pemar ti ditapi industrri kayu ramu ba renggat dunya,” ku iya.
Bekaul enggau aum besai nya, iya madahka diri gaga ati laban STA nyadi tuai rumah aum nya ti lalu nyadi pelasar enggau dinamik kena nempa kerejasama entara pengaga polisi, orang ti landik sereta pandai dalam industri enggau mayuh bengkah pemegai taruh.
Iya madahka, pengerami nya dikena nekanka pemesai guna SFM dalam nempa tadbir urus ti manah, nyaga rampa menua enggau tanggungpengawa rama.
Ku iya, aum besai nya ukai semina meransang ngambika berandau sereta berunding ngiga chara praktikal ti enggau tuju kena nempa menua ti lebih meruan jemah ila.
Sama bisi datai ba pengerami tu kemari, Direktor Opis Kampung Sarawak, Datu Hamden Mohammad; Chairman WWF-Malaysia, Tan Sri Abdul Wahid Omar enggau