JBPM Sarawak udah nemu sekeda palan titik angat, risiko angus kampung
Opis Bomba enggau Penyelamat Malaysia (JBPM) Nengeri Sarawak udah nemu sekeda kandang endur angat ti bisi risiko deka nyadi penusah angus kampung enggau tanah paya di nengeri tu.
Direktor JBPM Nengeri Sarawak, Datu Khirudin Drahman madahka entara kandang menua tu iya nya ngaul Sri Aman, Baram di Miri enggau utara Sarawak nyengkaum ba pelilih menua Limbang enggau Lawas.
Ku iya nerang, kandang menua tu udah ditemu asil ari peneleba ke kala nyadi ba raban sida ti ngaul penusah angus besai kampung enggau tanah paya ti nyadi dalam taun 2018 enggau 2019.
“Nyema diperatika ari penusah angus ti besai kena taun 2018 enggau 2019 di Sarawak ti ngaul mayuh kandang menua baka Sri Aman, Baram di Miri lalu utara Sarawak di Limbang enggau Lawas.
“Kitai bisi mayuh kandang menua ti betanah paya lalu lebuh udah ditemu kitai kitai udah ngaga advokasyen,” ku iya lebuh ke ditanya media maya ngelawa ngagai Operasyen Madamka Penusah Angus Paya di Banting Lawas enggau Balai Bomba enggau Penyelamat (BBP) Lawas kena Hari Satu nyin tadi.
Sama bisi maya program tu iya nya Ketuai Bomba Zon Tujuh Limbang Ramlan Marajan, Ketuai Balai BBP Lawas Azman Ibrahim, Ketuai BBP Limbang Chong Bui Chyan, Pemesai Pengawa Nasat Kes Penusah Angus Zon Tujuh Limbang Clarence D. Primun Tiandun enggau Ketuai Polis Pelilih Menua Lawas DSP Liong Tindan.
Ku iya nerang, raban sida terus ngangkatka advokasyen enggau Opis Mineral enggau Geosains Malaysia sereta Opis Pengeraja Asal enggau Rampa Menua (NREB) Sarawak kelebih agi maya betapi enggau kes penusah angus ke enda disadang.
Ku iya agi, pengilap enggau ulah ti enda ibuh ari sekeda raban entara faktor besai ke ditemu ti ngujungka nyadi penusah angus kampung enggau tanah paya di nengeri tu kelebih agi ba bagi menua utara Sarawak.
Ku Khirudin madah bisi sekeda raban ke endang ngaga pengawa nunu ti enda betagang lalu ngujungka penusah angus kampung enggau tanah paya.
Ku iya nerang, kes penusah angus kampung tu nyadi ulih ngujungka aset dikena madamka api tu ba siti palan lalu ngujungka pemar lebuh bisi penusah ngenyit angus struktur di mengeri ti sereta.