‘Lembah Limbang’ dituku nyadi kandang endur ngeluarka padi
Premier Sarawak Datuk Patinggi Tan Sri Abang Johari Tun Openg madahka ‘Lembah Limbang’ dikelala nyadi siti agi kandang endur ngeluarka padi di Sarawak ti deka ngena teknologi moden.
“Maya betemu kami bisi berandau sereta asil berunding kami nemu Lembah Lembang ari suba nyadi kandang endur ngeluarka padi bekualiti, sereta pia mega kandang endur bukai.
“Kitai mesti nempa kerejasama enggau orang ti landik sereta pandai dalam al-Quran ti nyebut mesti bisi mesti bisi orang ti landik enggau bepenemu, (nya alai) asil kerejasama enggau orang ti bepenemu, di Simunjan padi ulih dikeluarka dalam timpuh 24 bulan lima musim enggau ngasilak sehektar lapan tan, dibandingka enggau diatu semina 1.2 tan,” ku iya.
Iya madahka pekara nya maya bejadi pengerami ‘Tilawah dan Menghafaz Al-Quran Peringkat Negeri Sarawak Ke-63’ di Dewan Suarah Limbang, ensanus.
Sama bisi datai bini iya, Datuk Amar Juma’ani Tun Tuanku Bujang; Sapit Premier Sarawak Datuk Amar Awang Tengah Ali Hasan,Sekretari Perintah Sarawak Datuk Amar Mohamad Abu Bakar Marzuki;
Sapit Menteri Pengangkut Datuk Hasbi Habibollah; Sapit Menteri Industri Pemakai, Komoditi enggau Pemansang Wilayah Datuk Dr Abdul Rahman Ismail; Sapit Menteri Utiliti enggau Telekomunikasyen Datuk Dr Abdul Rahman Junaidi sereta Yang di-Pertua Majlis Islam Sarawak Datuk Misnu Taha enggau bala pemesai bukai.
Abang Johari madahka, perintah Sarawak nuju ngagai era baru ba pengawa mutarka penanggul ubah iklim ti ketegal ngeluarka karbon enggau ngasilka energi gadung ke ulih dikena baru ari ai.
“Tu pekara ti dipejalaika perintah Sarawak sereta lebuh kitai bisi ekosistem ti baru, kitai fokus ngagai pekara ti diguna mensia iya nya energi kena kitai ngemujurka pemansang ekonomi kitai,” ku iya.
Bekaul enggau pekara bukai, iya meransang raban Islam ngerepaitka penyerakup enggau nambahka penemu laban nya beguna kena ngenegapka kerejasama enggai ngangkatka pengelandik enggau penau.
“Kitai ngelatih bala anak Islam enggau pegawai dianjung ke Oxford, England, sida bisi
kereban chara idup di barat enggau timur, ngemajuka komuniti Islam setipak enggau konsep Sarawak ti maju enggau belimpah,” ku iya.
Nambah nya iya madahka, Sarawak bisi chara ngurus enggau manah ti ngayanka nengeri tu dikemansang pemesai sebedau tu enggau ditampung pemesai ke diatu ti mai berubah ba ekonomi enggau iklim.
Ku iya, menua tu jemah ila ditentuka rebak biak ti lalu nyadi lalau Islam sama ngemansangka komuniti kelebih agi di Sarawak ti mayuh pupu bansa enggau jalai pengarap.