Kampung tropika ti berega patut diintu enggau meruan
Kampung tropika chukup berega patut bendar diintu ngena chara ti meruan, pia ku Yong Teng Koon ti kala nyadi Chief Executive Officer Malaysian Timber Certification Council (MTCC).
Kena nentuka ulih diurus enggau meruan, ku iya, amat beguna kitai nentuka aspek Sustainable Fores Management (SFM) laban nya meri nilai ekonomi ti ukai semina bekaul enggau kayu ramu tang nyengkaum ekonomi enggau servis ekosistem.
Iya madahka industri mega begunaka polisi ti nyukung enggau rampa menua ti nyengkaum jamin hak timpuh panjai.
“Kitai patut menambah nilai ngagai nama pekara ke patut dikereja kitai, tang aspek ekonomi iya nya siti aspek ke patut diperundingka.
“Aku ngasaika industri begunaka polisi ti nyukung enggau rampa menua ti nyengkaum jamin hak timpuh panjai mega siti pekara ti dikearapka (industri) ulih diperundingka perintah ti bekaul enggau ungkus sida,” ku iya.
Iya madahka pekara nya lebuh ti bejaku ba pengawa nutup Persidangan Antarabangsa Pengurusan Mampan Hutan Tropika, ti diatur Gerempung Kayu Ramu Sarawak (STA) di sebuah hotel ditu, kemari.
Bejaku baru iya madahka krisis iklim endang nyata sereta ngemeranka SFM pintar ti nyendiaka chara mutarka penanggul bepelasarka rampa menua asal.
“Tang baka ti ditemu SFM iya nya pekara ti tusah dipejalaika laban proses ti panjai, pejalai ti panjai ti ditapi kompeni tauka industri kelimpah ari begunaka insentif enggau begunaka mayuh duit. Nya pekara ti ditai ari sukut ngepunka chara nya,” ku iya.
Kelimpah ari nya iya madahka pengawa berunding entara mayuh bengkah pemegai taruh, kolaborasyen enggau pengawa bekunsi amat beguna sereta patut chakah dipejalaika.
“Kepenudi bendar, pengawa berunding, kolaborasyen enggau bekunsi penemu ari mayuh pemegai taruh amat beguna. Sekalika kami mendingka penemu kita pagi tu?
“Aku deka nyimpul ditu, iya nya kitai bejakuka pasal bekunsi, pasal kolaborasyen, bejakuka pasal sama meri sukung ngagai pangan diri. Serata aku ngasaika kitai ngereja lebih ari nya sereta bulih mayuh agi pemujur,” ku iya.