Bejalaika inventori emisyen GHG entara fungsyen baru NREB
Bejalaika inventori emisyen gis rumah gadung (GHG) entara siti ari tiga fungsyen baru Lembaga Sumber Asli dan Alam Sekitar Sarawak (NREB) kena nentuka agenda sifar beresi lebuh manggai 2050 di Sarawak ulih dijapai.
Kontroler Kualiti Rampa Menua Sarawak, Jack Liam madahka, fungsyen baru nya setipak enggau kuing perintah Sarawak ti nuju ekonomi gadung sereta sifar beresi lebuh manggai 2050.
Nengah Perambu UndangUndang (RUU) Rampa Menua GHG 2023, NREB diberi tanggung pengawa bejalaika GHG inventori, ngerejista industri bepelasarka energi sereta minyak enggau gis.
“Kelimpah ari nya, ngerejista juruaudit luar, nerima ripot GHG emisyen ari sida industri, meri levi ngagai industri ti ngeluarka GHG ngelui ari pemayuh ti ditetapka,” ku iya.
Iya madahka pekara nya lebuh bejaku ba pengerami ‘Penghargaan Media NREB
Sarawak’ di Hotel Sheraton ditu malam ensanus.
Jack nerangka, NREB mega deka matau pejalai pengawa ngurangka emisyen GHG bepelasarka pelin ti dibantaika.
Nambah nya, fungsyen ti
kedua iya nya bekaul enggau pengawa nangkap, nguna enggau nyimpan karbon (CCUS).
“NREB deka ngambi bagi ba pengawa nentuka karbon ti dibai tama ngagai ai Sarawak iya nya setipak kelimpah ari bisi sempekat enggau
pemegai lisin tauka ejensi bekaul di Sarawak sereta diangkut ngena perengka pengangkut ti bisi lisin ari ejensi ti bekaul,” ku iya.
Berebak enggau tu, NREB mega ngambi tanggung pengawa fungsyen ngatur rampa menua ari Opis Rampa Menya nengah ‘MA63 Transfer of Autonomy’ dalam aspek rampa menua ti deka dipejalaika berenggat.
Ku iya, fasa keterubah fungsyen nya nyengkaum ngambi tanggung pengawa ngurus ‘Buangan Terjadual’ dipelaba deka diambi tanggung pengawa kena 1 Januari 2025.
“Kediatu, NREB benung nyikap diri ba lima aspek besai iya nya undang-undang, pemansang sistem, puncha guna mensia, operasyen enggau infrastruktur,” terang iya.
Ngenang pengerami nya, bisi lebih ari 50 iku raban media ngulu pengerami nya.
Iya madahka tuju pengerami nya diatur dikena beterima kasih ngagai tanggung pengawa media ti mantu ejensi nya mantaika program ke diatur sida iya dalam pengeran mantu perintah ngemansangka nengeri tu.
Sama bisi datai ,Presiden Wartawan Bahagian Kuching Ronnie Teo sereta raban menua di mengeri besai tu.