Pengawa ngelakuka lagu Iban, penanyi menua tu patut disukung
Kena ngemansangka industri pemerindang enggau seni kreatif di Sarawak, ti ulih chakah dikerembai: Andenson
MIRI: Pengeran pengawa ngelakuka lagu dalam jaku Iban enggau penanyi menua tu patut diperansang kena ngemansangka industri pemerindang enggau seni kreatif di Sarawak.
Pekara nya dipadahka Andenson Dato Paran, pengemeran industri pemerindang enggau seni kreatif menua tu maya baum pengarang berita ditu, Hari Empat.
“Kami bebendar deka ngamatka pekara tu laban nasit enggau dudi hari industri pemerindang enggau seni kreatif di Sarawak ulih chakah ngerembai,” ku iya.
Nitihka iya, inisiatif ti dilanggur enggau deka dipejalaika sida swasta mega bepanggai ngagai sukung ari mensia mayuh nyengkaum kompeni swasta ke deka bejalaika tanggungpengawa rama korporat (CSR) sida.
“Enda ulih disangkal raban pemerindang enggau penanyi menua tu begunaka bantu enggau sukung ari komiti nyengkaum sektor swasta awakka sida ulih nyapai tikas pemujur ti lebih tinggi,” ku Andenson ti mega Chairman Eksekutif Kumpulan BMAS Holdings Sdn Bhd ti nyengkaum ari Borneo MA Smart Vendors Sdn Bhd (BMAS), BMAS Construction Sdn Bhd enggau BMAS Entertainment Enterprise.
Kena mungkal ku iya, raban kompeni iya udah nempa kerejasama enggau penanyi Iban menua tu Rickie Andrewson ba pengawa ngaga klip video pemadu baru lagu tebilang ‘Bekikis Bulu Betis’.
Nambah nya ku iya, kompeni iya deka terus bebendar ngaga enggau ngeluarka
Kami bebendar deka ngamatka pekara tu laban nasit enggau dudi hari industri pemerindang enggau seni kreatif di Sarawak ulih chakah ngerembai.
Andenson Dato Paran
Pengemeran industri pemerindang enggau seni kreatif
sebuah agi klip video lagu ti deka ngemeranka semengat Segulai Sejalai enggau penyerakup dalam komiti di Malaysia.
“Semua asil pengawa kompeni kami tu iya nya kena mantu bala pemerindang menua tu enggau mega ngelakuka lagi sida ba dunya seni menua enggau di rantau tu,” terang iya.
Kelimpah ari nya, kompeni mega deka ngaga sekeda klip video lagu menua tu jemah ila sereta mensia mayuh diperansang nyukung inisiatif nya, iya nya ngena chara meri kelai rindu enggau bekunsi pekara nya ba media rama.
“Ngena sukung ari mensia mayuh enggau kompeni swasta, inisiatif komuniti baka tu deka meri penguntung ngagai semua ti bekaul dalam industri pemerindang kitai kelebih agi raban biak ti begunaka peluang ngansah penau enggau pengelandik seni sida,” ku iya.