Nanta sinu ati nerima berita penusah bot karam di Sungai Batang Baleh
Kaban Parlimen Kapit Dato Sri Alexander Nanta Linggi madahka diri berasai sinu nerima berita penusah bot karam di Sungai Batang Baleh, semak jelatung Sekolah Kebangsaan (SK) Lepong Baleh, di Kapit, lemai ensanus.
Nyentuk kediatu, ku iya, baka ti dipadah, empat iku nyengkaum dua iku polis agi lenyau sereta pengawa ngiga enggau nyelamat (SAR) benung chakah dipejalaika raban autoriti.
“Aku ngarapka sida ti sebilik enggau orang ke kena penusah tu ulih liat ati betapi penguji tu, sereta sama kitai besampi ngambika semua sida nya ulih ditemu enggau lengkas sereta likun.
“Aku udah betanya ngagai Tuai Polis Pelilih Menua Kapit DSP Rohana Nanu deka nemu penerang pemadu baru pasal insiden tu.
“Aku mega minta staf enggau pegawai ba opis Kaban Parlimen Kapit terus nitihka pemansang berita penusah enggau operasyen SAR sereta meri bantu ke patut ngagai sida ti bekaul,” ku iya dalam siti penerang, kemari.
Berebak enggau tu, Menteri Kereja Raya nya ngelalau semua orang ti ngena perengka pengangkut ai kelebih agi sida ke enda nemu nyemerai, ngambika seruran bejimat enggau ngemeratka aspek pengelikun nyengkaum seruran ngena jaket pengelikun.
Raban ti bejalaika perengka pengangkut ai mega, ku iya, patut bejalaika tanggung pengawa enggau serius dalam nentuka semua orang tambang sereta kru nitihka enggau patut atur pengelikun ti ditetapka.
“Aram kitai sama bebendar besaup ngangkatka tikas servis enggau tikas pengelikun servis pengangkut ai di Sarawak nyengkaum di Kapit ke pemanah enggau pengelantang semua orang,” ku iya.