Dua iku kena penusah bot karam di Batang Baleh iya nya polis
KAPIT: Tuai Polis Pelilih Menua Kapit Deputi Superintendan Rohana Nanu madahka dua ari empat iku ti diripotka agi lenyau dalam penusah bot karam di Batang Baleh semak Sekolah Kebangsaan (SK) Lepong Baleh, lemai Hari Empat iya nya polis.
Dua iku polis nya, iya nya Sarjan Jonathan Lambet, 51, ari pampang Pengelantang Pendiau enggau Konstabel Iskandar Zulkarnain Ibrahim, 28, ari pampang Kereban Senyata gawa ba Indu Opis Pelilih Menua (IPD) Kapit.
Ku Rohana, dua agi peranak menua tu mega diripotka lenyau iya nya Emerson John James Naim, 47, enggau deriba bot, Jack Balan, 44, lalu Moses Ngu, 47, mujur diselamatka mensia mayuh.
Nitihka iya, maya penusah nya nyadi seduai udah ke Kuching bejalaika pengawa nyempulang kereban peletup dikeempu sebuah kompeni ari Kuching ke sebuah Kem di Nanga Tulie kena 6 Mac apin lama.
“Dalam penusah ti nyadi urung pukul 5 lemai Hari Empat (7 Mac), dua iku polis begulai enggau tiga agi orang tambang benung dalam pejalai pulai ke Kapit nuju ngagai Kem Nanga Tulie ti mai kereban peletup ngena bot fiber 30hp (kuasa kuda).
“Maya ba endur penusah nyadi, bot ke ditepan sida benung biluk ke kiba mimit nuju ke ulu sungai enggau nempuh ai ti bepusin ngujungka
bot nya karam,” ku iya dalam siti penerang kemari.
Ketegal pekara nya, ku iya siku (Moses) mujur diselamatka mensia mayuh lalu
empat agi lenyau dianyutka arus deras.
“Pansik tumu iya nya semua orang tambang nya sama bekejang ari jelatung SK Lepong Baleh nuju kem Nanga Tulie nganjung kereban peletup.
“Siku saksi iya nya penyaga sekula nya bisi meda penusah bot karam nya nyadi sebedau bepadah ngagai balai Polis Kapit,” terang iya.
Rohana madahka, SAR hari keterubah ti berengkah ari pukul 6 lemai diketuka nyentuk pukul 6.30 lemai Hari Empat.
Nyentuk berita tu ditulis kemari, operasyen ngiga benung chakah dipejalaika raban polis begulai enggau Bomba, Angkatan Pertahanan Awam, Opis Residen, Lembaga Sungai-Sungai Sarawak enggau orang ke sebilik enggau sida ke kena penusah nya.