Dr. Sim: Sektor swasta diperansang nyaup perintah Sarawak ngemansangka nengeri tu
Timbalan Premier Datuk Amar Dr Sim Kui Hian meransang semua sektor swasta sama ngambi bagi enggau perintah Sarawak ngemansangka nengeri tu.
Nitihka Dr. Sim. kerejasama swasta amat beguna kena nentuka pemujur Sarawak ti diiring Premier Datuk Patinggi Tan Sri Abang Johari Tun Openg betukar ngagai ekonomi digital enggau ulih dikena baru.
“Kitai amat betuah di Sarawak bisi universiti baka Swinburne ti nyendiaka mayuh peluang pelajar ngagai rayat.
“Ba taun 2026, Swinburne sereta universiti Sarawak ti bukai deka bejalaika tangkup pengawa lebih beguna kena nempa bansa Sarawak,” ku iya.
Iya madahka pekara nya maya bejaku ba pengerami betukar Sempekat Pemereti Ati (MoA) entara Universiti
Teknologi Swinburne Kampus Sarawak enggau BioTective Sdn Bhd di universiti nya ditu, kemari.
Ba pengerami nya, Dr. Sim ti mega Menteri Pengerai Mensia Mayuh, Pengawa
Berumah enggau Perintah Lokal mega bejadi Program Ngenegapka AI enggau Digital Swinburne.
Ngenang bekaul dua program nya, Dr. Sim madahka nya amat beguna laban dikemansangka
orang ti landik enggau pandai ari Sarawak empu.
Ari aspek AI (Pemintar Artifisyel) ku iya, teknologi nya ngerembai enggau jampat sereta ia amat beguna dalam pengidup mensia tiap hari.
“Kitai mesti ulih nerima enggau ngena AI, laban enti enda kitai deka tinggal,” ku iya.
Bekaul enggau MoA entara Swinburne enggau BioTective iya nya deka bejalaika kereja pemansik enggau pemansang di Pusat Sumber Penyakit Generasi Akan Datang (NXDRC).
Pengawa betukar dokumen nya entara Sapit Pro Canselor (Pemansik) Profesor Dr Ida Fatimawati Adi Badiozaman enggau Ketuai Pegawai Eksekutif BioTective, Peter Ting Yiik Pung lalu dikemataka Dr Sim.
Program Ngenegapka AI enggau Digital Swinburne iya nya program inovatif ti enggau tuju ia kena nyikap kompeni enggau industri ngena penemu sereta kereban ti diguna kuasa AI enggau mutarka digital.