Pengajar ejen pengubah ti nyikap nembiak betapi penguji era globalisasyen
Tanggung pengawa pengajar diatu ukai semina ngajar tang nyadi ejen pengubah ti deka nyikap nembiak betapi penguji era globalisasyen, ku Premier Sarawak Datuk Patinggi Tan Sri Abang Johari Tun Openg.
Iya madahka, ubah ngelingi diatu begunaka pengajar nambaka pengelandik diri kena besemekih sereta setipak enggau dunya luar.
“Lebuh serata dunya betapi enggau pandemik COVID-19 ba taun 2020, pekara nya udah ngayanka elemen ‘Volatility, Uncertainty, Complexity and Ambiguity’ (VUCA).
“Lalu pia mega dalam pelajar, aku pechaya orang ti ngurus, pengajar, nembiak sereta mega apai indai patut betapi ubah nya ti datai enggau jampat.
“Ambika chunto, suba pengawa ngajar enggau bedipejalaika
lajar semina dalam bilik kelas ngena papan chelum,
lalu pengajar nyadi orang ti nibarka penemu.
“Tang maya pandemik, pengajar patut nguasa tauka
nemu teknologi digital sereta proses ngajar enggau belajar ngena chara online,” ku iya.
Iya madahka pekara nya nengah teks jaku iya ti dibacha Sapit Premier Sarawak Datuk Amar Dr Sim Kui Hian ba pengerami serumpu makai lemai ‘Juh Berambeh Gerakan Massa #terimakasihcikgu’ ditu malam Hari Lima.
Berindik ari pekara nya, Abang Johari madahka endang amat beguna bala pengajar nambahka pengelandik diri awakka ulih nibarka penemu enggau pemandai ngagai nembiak kelebih agi dalam era globalisasyen diatu.
“Nambah nya, pengajar mega megai tanggung pengawa mantu nempa perangai enggau semengat penaluk ke menua ba raban nembiak laban sida ti deka nampung enggau neruska legasi nyadi pengiring jemah ila,” ku iya.
Kelimpah ari nya, iya madahka, pelajar di Sarawak benung betapi pemansang besai reti dalam pengeran nyapai juluk nengeri maju setipak enggau Strategi Pemansang Pengudah COVID19 (PCDS) 2030.
“Dalam pekara tu, Sarawak benung ngemansangka ekosistem ti matak industri baru ke fokus ngagai data bank betikas antarabansa, nempa isi digital sereta ngangkatka inovasyen digital enggau pengawa bedagang,” terang iya.
Berindik ari pekara nya, iya beterima kasih ngagai KPM ti bejalaika chara proaktif dalam pengawa ngaga tauka ngemanahka agi sekula ti udah tuai di nengeri tu.
Bekaul enggau pengerami Juh Berambeh Gerakan Massa, Abang Johari minta semua orang bekerejasama nyadi siti tim kena nentuka agenda pelajar ti manah agi ke penguntung rebak jemah ila.