Industri ngintu ngeli Sarawak ulih ngerembai, tegap: Abang Johari
KUCHING: Industri ngintu pengerai ngeli Sarawak deka mansang ngerembai enggau tegap jemah ila laban ekonomi Sarawak terus ba dalam arus ti manah.
Premier Sarawak, Datuk Patinggi Tan Sri Abang Johari TunOpengmadahka,pengawa ngintupengeraienggaupemansik perubat iya nya subsektor ti bisi potensyel meri penumbuh ti tegap ngagai Sarawak.
Ku iya, industri ngintu pengerai tauka dagang temuai perubat nyengkaum ngeli, ulih nyadi siti potensyel besai enti bisi akses mudah ngagai nengeri tu nengah langit tauka darat ti nguntungka makit di rantau Asia-Oceania kelebih agi Indonesia.
“Aku pechaya ngena infrastruktur pejalai ti chukup nyambungka Kuching enggau alai bukai ba rantau tu, kelebih agi di Indonesia enggau Australia, ditambah enggau penatai servis ngintu ngeli ti bisi standard tinggi sereta rega ti kompetitif, Sarawak ulih nyadi palan dipilih orang di rantau tu ngulihka perubat oral.
“Aku ngarapka kitai ulih ngisi mimit ke puang enggau ‘missing link’ enti Sarawak udah bulih MASWings ari perintah besai,” ku iya lebuh bejadi ‘Kongres Pergigian
Borneo Ke-12 dan Pameran Perdagangan’ ditu, kemari.
Iya madahka pekara nya dalam teks jaku ti dibacha Sapit Premier Sarawak ti mega Menteri Pengerai Mensia Mayuh, Pengawa Berumah enggau Perintah Lokal, Datuk Amar Dr Sim Kui Hian.
Ku Abang Johari, Sarawak begunaka infrastruktur langit ke diri empu kena mai tama mensia mayuh, temuai enggau orang ke raun serayabejalaika pengawa dagang laban nadai chara bukai kena mai sida tama ke Pulau Borneo kelimpah ari ngena penerebai.
Iya madahka, ari nya pengawa ngintu pengerai di Kuching mega deka tebilang ba peranak di menua ti beserimbaienggauSarawak,kelebih agi Kalimantan Barat.
Nambah nya iya madahka, peranak Kalimantan Barat datai ngena jalai darat nengah Tebedu, sereta sekeda engka ngena penerebai ari Pontianak ke Kuching.
Berindik ari pekara nya, iya arap bendar industri ngintu pengerai nyengkaum ngeli di Sarawak deka ngerembai enggau tegap jemah ila.
“Penumbuh nya ukai automatik laban pengemeran industri mesti nyendiaka diri empu nyadi pengemeran aktif kena nyukung visyen ngemansangka Sarawak nyadi hab perubat enggau nyaga ngeli, ukai semina di Asia Tenggara tang mega dunya ti nyendiaka perubat enggau servis ti manah.
“Lutur ngeli enggau lutur perubat patut belajar enggau bekunsi penemu kena ngemaruka pengelandik sida awakka ulih meri servis bekualiti sereta matak mayuh agi peranak luar datai ke Sarawak lalu berubat,” ku iya.
Nya alai, Abang Johari amat nyukung kongres nya ti bisi 10 iku pengelicha ari serata dunya bekunsi penemu sida enggau semua lutur ngeli enggau staf pemantu ngintu ngeli.
“Tu ngayanka Persatuan Pergigian Malaysia Zon Timur udah bebendar ngepunka mai pelajar enggau pengelandik bekualiti ti dipekunsi enggau semua raban profesional ditu.
“Ngena platform tu, profesional ulih gempuru sama belajar enggau bekunsi penemu ti lalu meri penguntung ngagai pesakit,” ku iya.
Sama datai ba pengerami nya, Presiden Persatuan Doktor Pergigian Malaysia (MDA) Profesor Madya Dr Mas Suryalis Ahmad enggau Chairman Pengatur Dr Mary Chieng.