KMKK fokus aspek pengelikun, pemansang genturung pendiau, rumah panjai
Tanggung pengawa KMKK majak kompleks ti begunaka sida terus beratika semua aspek pemansang genturung pendiau
LIMBANG: Tuai genturung pendiau enggau tuai raban komuniti (KMKK) bejalaika tanggung pengawa beguna ti ukai semina ngemansangka kandang endur tang mega patut meri fokus ngagai aspek pengelikun enggau pemansang genturung pendiau.
Sapit Menteri Industri Pemakai, Komoditi enggau Pemansang Wilayah, Datuk Dr Abdul Rahman Ismail madahka, tanggung pengawa KMKK majak kompleks tauka mar ti begunaka sida terus beratika semua aspek pemansang gen- turung pendiau.
Kaban Kunsil Nengeri (ADUN) Bukit Kota nya nerangka iring tuai ba renggat rayat patut mantu ngamatka agenda pemansang ti nadai ngetu dipejalaika perintah.
“Nya kebuah pengawa milih sida KMKK endang diatur enggau bejimat, laban kitai enggai ke genturung pendiau enggau rumah pan
jai sereta kandang endur di mengeri tinggal.
“Tanggung pengawa sida amat beguna enggau besai reti iya nya nyaga kandang endur diri empu nyengkaum pengelikun enggau pemansang genturung pendiau,” ku iya bejalu ba pengerami Tuai Begulai enggau Rayat sereta pengawa nyuaka chek Projek Mit Menua Pesisir (MRP) ADUN Bukit Kota ti diatur di Dewan Kampung Bunga Raya, Limbang, kemari.
Sama bisi datai, Residen Limbang Yunus Tambi enggau Pegawai Pelilih Menua Limbang Sulaiman Engal.
Terang Dr Abdul Rahman baru, perintah nyendiaka mayuh kereban infrastruktur nyengkaum jalai raya, ai, elektrik, ngaga dewan enggau kereban bukai awakka bisi diguna enggau meri pengelantang ngagai peranak di kandang genturung pendiau enggau rumah panjai.
Ku iya, pemansang teknologi diatu minta tauka begunaka tanggung pengawa proatif ba iring tuai renggat rayat kena ngenegapka pemansang dalam semua aspek nyengkaum ekonomi, sosial, pelajar, teknologi dalam komuniti.
Nya kebuah pengawa milih sida KMKK endang diatur enggau bejimat, laban kitai enggai ke genturung pendiau enggau rumah panjai sereta kandang endur di mengeri tinggal.