Perintah Sarawak bebendar deka numbuhka kompeni penerebai bilun kediri
KUCHING: Pengawa berandau bekaul enggau ngambi kompeni penerebai bilun MASwings ari perintah Sarawak dipelabaka deka tembu ujung taun tu, ku Premier Sarawak Datuk Patinggi Tan Sri Abang Johari Tun Openg.
Nitih ku Abang Johari, pengawa ngambi MASwings iya nya dikena nentuka Sarawak bisi kompebni penerebai bilun kediri enggau rega tambang ti engkeman agi ungkup rayat.
“Penanggul kitai di Sarawak nyengkaum kaban kitai di Sabah, rega tambang (tikit bilun) suah niki ninting musin pengerami hari besai sekalika Hari Raya, Taun Baru, Krismas tauka kemisi besekula.
“Ni kitai tan, tetiap kali pengerami hari besai, tambang niki. Ke Kuala Lumpur aja udah lebih RM1,000... Manah agi e Hong Kong,” ku iya lebuh ti bejaku ba Program Nangguh Pengerami Gudi Antarabansa Kabong (KIKF) 2024 ba Dewan Terbuka Pantai Tanjung Kembang, Kabong kemari.
Bekaul enggau pemansang di Kabong, ku Abang Johari madah, perintah deka ngemansangka Pasar Baru Kabong enggau kandang berumah baru dikena matak penatai mensia mayuh ke pelilih menua tu.
Ku iya, enggau pemisi
kandang berumah ti berurun sereta premis dagang ke moden tu deka matak mayuh orang ke Kabong lalu mega deka nambah ekonomi ngagai orang Kabong.
“Kandang endur berumah ke deka kitai kemansangka tu mega murah agi enggau tikas bunga duit jali 1 peratus ari bank kitai empu, Mutiara Mortage.
“Pia mega pasar baru ke deka dikemansangka kitai tu mungkus semua bansa setipak enggau Strategi Pemansang Pengudah COVID-19 (PCDS) 2030,” ku iya.
Dulu ari tu, Abang johari mega ngelaluka penatai pesereta antarabansa dalam pengerami tu lalu ngarapka
sida ngasaika hari tichukup manah semanjai di Sarawak.
AbangJoharimegapechaya enggau kaul pesereta antarabansa dalam pengerami tu deka nambahka agi penemu sida bekaul enggau Kabong sereta Pulau Borneo enggau Sarawak mega kelebih agi ti nyadi palan ke endang beserakup dalam menua Malaysia.
Sama bisi datai iya nya Sekretari Perintah Sarawak Datuk Amar Mohamad Abu Bakar Marzuki, Sapit Menteri Pengelantang Komuniti Datuk Mohamad Razi Sitam enggau ADUN Kabong Mohd Chee Kadir ti nyadi chairman komiti ngatur pengawa KIKF 2024.