Ari sukut undang-undang tikah lelaki semina ditetapka bebini siku aja

Menteri Pemansang Orang Indu, Nembiak Mit enggau Pengelantang Komuniti Dato Sri Fatimah enggai meri penemu dalam agi bekaul isu siku lelaki China ti bebini dua, ke udah dikerembai ba media rama.

Fatimah madahka, baka ti ditemu ari sukut undang-undang endang bisi tikah sivil, tikah orang Islam sereta tikah nitihka adat, ti netapka lelaki semina bebini siku.

Taja pia, Fatimah madah isu nya ukai ari kuasa opis menteri tang iya arap bendar Opis Pengerejista Bansa (JPN) deka meri penerang.

“Udah tentu ari sukut undang-undang kitai, sereta aku ngasaika sida JPN mega setuju, (iya nya) kitai bisi tikah sivil, tikal orang islam enggau bansa tikah ketiga orang Sarawak iya nya tikah nitihka adat. Ari baruh tetiap bansa tikah tu deka bisi atur tauka undang-undang ia.

“Enti nitihka sistem tikah sivil, (lelaki) semina dikemendarka nikah enggau siku aja, enti adat pan siku, lalu enti tikah orang Islam ia bisi atur ia empu.

“Aku ngasaika JPN deka meri saut ke betul enggau silik (pasal isu tu ti dikeremabi ba media rama). Pekara tu mega udah diluar bidang kuasa aku,” ku iya dirandau pekara nya maya baum pengarang berita ti diatur ba rumah iya di Jalan Bakti ditu, kemari.

Dulu ari nya iya nerima penemuai basa raban ari Opis Menteri Pemansang

Indu, Nembiak Mit enggau Pengelantang Komuniti, sereta Opis Menteri Nembiak, Lumba enggau Main, sereta Pemansang Orang Dagang bekaul enggau Para SUKMA 2024.

Kemari, isu siku lelaki menua tu ngerembai di media rama pengudah gambar iya begulai enggau dua iku bini iya ba siti pengerami resepsyen tikah dikerembai di Facebook.

Siti ari gambar nya ngayanka dua iku indu enggau siku lelaku ngena ngepan kawin asal China, sereta siti agi ngena gari kawin baka fesyen Barat.

Isu tu nerima macham timbal ari orang mayuh ti bekena ke media rama, ti tebal agi meri pengaga ati enggau temegah ngagai pasang nya.

Taja pan poligami sah di Malaysia iya nya entara siku ngagai empat bini, tang nya semina dikemendarka ngagai rang Islam aja.

Ngagai ke ukai bepengarap Islam poligami tauka bebini mayuh enda dikemendarka ari baruh Undang-undang Persekutuan Malaysia - Akta Membaharui Undang-Undang (Perkahwinan dan Perceraian) 1976 laban undangundang semina ngaku tikah monogami sereta tikah bukai kelimpah ari nya (monogami) dianggap enda sah.

Bepelasarka, portal rasmi JPN Opis Menteri Dalam Nengeri madah iya nya siku orang ti udah nikah ngena chara sah ari baruh enda ngira bagi undang-undang enda tauk nikah baru ngena chara sah enggau orang bukai maya agi jadi enggau bini sah, sereta tu agi dikemeran enggau dikemeratka di Malaysia tauka enda ngira ba bagi menua bukai.

Nitihka portal nya, nyema orang sesiku nya udah nikah ngena chara sah ari baruh undang-undang, jalai pengarap, adat tauka nikah baru maya agi jadi sah enggau lali tauka bini, nya dipadah ngelanggar penyalah ari baruh Seksyen 494 Kanun Keseksaan.