Polisi insklusif Premier nyadika Sarawak beserakup dalam pemaik
Taja pan diversiti ti besai Abang Johari nyukung ‘kitai komiti ti mayuh bansa, jalai pengarap’, ku Uggah
KUCHING: Polisi inklusif Premier Sarawak Datuk Patinggi Tan Sri Abang Johari Tun Openg udah nyadika Sarawak lebih beserakup enggau dalam pemaik taja pan bisi diversiti ti besai.
Sapit Premier Sarawak, Datuk Amar Douglas Uggah Embas madah Abang Johari ngaku, nyukung sereta ngerami iya nya ‘kitai komiti ti mayuh bansa, jalai pengarap’.
Uggah madahka Abang Johari udah nyadi penyukung tegap Unit Pekara Jalai Pengarap Bukai (UNIFOR) kenyau ari taun 2017 kena nyaga hak enggau pemanah tauka penguntung tiap bansa enggau jalai pengarap.
“Iya (Abang Johari), nadai kala enda, udah meri enggau gerah jari ngagai bajet operesyen (ngagai UNIFOR).
“Taun nyin kemari iya meri RM100 juta, sereta taun tu iya nambahka nyadi RM110 juta,” ku iya madahka pekara nya maya serumpu makai lemai diatur UNIFOR ungkup deligit ari Internationqal Advisors of United Partnership in the Gospal (USPG), malam ensanus.
Deligit nya nyengkaau ari Ghana, England, Botswana, Namibia, Kanada, India enggau Wilayah New Zealand nyengkaum Polynesia enggau Samoa.
Diligit nya diketuaika Sekretari Besai, Rev Dr. Duncan Dormor, sereta disempulang Bishop Kuching Datuk Danald
Jute.
Uggah bejaku baru madahka, kenyau ari taun 2017 nyentuk ngagai 2022 UNIFOR udah melanjaka lebih RM333.12 juta dikena ngaga gerija baru, chapel tauka kuil.
“Kelimpah ari nya, iya taun tu udah ngemendarka ungkup belanja sepenyampau RM20 juta dikena mantu sekula misyen di serata nengeri tu.
“Kenyau ari taun 2021 nyentuk ngagai taun nyin kemari, UNIFOR udah melanjaka RM50 juta kena mantu 127 sekula mubaligh/mission
ungkup pemansang enggau pengawa ngintu enggaungemanah fizikal sekula.
Lebuh bekunsi penerang enggau diligit nya mega, Uggah
madahka polisi perintah mega numbuhka sembilan ejensi pemansang wilayah ti mungkur tiap bengkah wilayah di nengeri tu ti nguntungka
semua komuniti.
Ku iya tiap ejensi diungkup RM1.5 bilion dikena ngemansangka infrastruktur sereta kena bejalaika aktiviti ekonomi ti ulih ngasil enggau nambahka penatai pemisi.
“Semua diberi peluang ti sebela. Lalu tu ukai retorik tang dipejalaika tauka dikemeranka,” ku iya.
Dr. Duncan lebuh bejaku madah diri temegah ati meda pekara ti dikeraja UNIFOR iya nya model kena meransang pemaik entara jalai pengarap.
Iya mdahka di United Kingdom kelebih agi endang mayuh sekula ari gerija Anglikan sereta tebal agi nembiak Muslim enggau komuniti Islam menua nya chukup beterima kasih ngagai sekula Anglikan, iya nya alai anak sida besekula.
Sama bisi nerima penemuai deligit, Sapit Premier Sarawak Datuk Amr Dr Sim Kui Hian enggau Sapit Menteri Pengerai Mensia Mayuh, Pengawa Berumah enggau Perintah Lokal Datuk Dr Penguang Manggil.
Iya (Abang Johari), nadai kala enda, udah meri enggau gerah jari ngagai bajet operesyen (ngagai UNIFOR).