Sarawak deka terus mantu nembiak ti enda sah status peranak menua ulih nyadi rayat Malaysia
Sarawak nengah Jawatankuasa Khas Kewarganegaraan ari baruh Perkara 15A deka terus mantu anak tauka nembiak mit nengeri tu ke enda sah rayat menua tu ngambika ulih nyadi rayat Malaysia.
Pekara nya dipadahka Menteri Pemansang Indu, Nembiak Mit enggau Pengelantang Komuniti, Dato Sri Fatimah Abdullah lebuh ditanya bekaul enggau perambu ti deka ngubah Perlembagaan bekaul enggau hak nyadi rayat Malaysia, ti deka dibai di Parlimen.
Fatimah madahka Sarawak enda terus ngaku alah bekaul pekara nya sereta agi ngena budi bicara tauka pengelandik ngaga pemutus ari Opis Menteri Dalam Nengeri (KDN).
“Kitai agi bepegai ba budi bicara tauka pengelandik ngaga pemutus laban sebedau tu pan kitai ngena budi bicara.
“Amat pedis deka nemu sapa bagi apai indai endar
anak nya laban ditu kitai bejaku ke anak tauka nembiak mit ti ditinggal tauka dibuai (apai indai) sereta dijaga institusyen (Opis Pengelantang Komuniti Sarawak).
“Peneleba kitai iya nya taja pan kitai ngaga iklan ba semua surat berita dalam mayuh jaku ketegal deka nemu sapa apai indai ti ngadaka anak nya, tang nadai mih apai indai nya datai betemu enggau kami. Kebuah kitai deka nemu sapa bagi apai indai ti bendar awakka isu nyadi rayat menua tu ulih diputarka
enda nengah perkara 15A,” ku iya.
Dulu ari nya iya bisi nerima penemuai basa pengari dua bengkah opis menteri iya nya Opis Menteri Pemansang Indu, Nembiak Mit enggau Pengelantang Komuniti, sereta Opis Menteri Nembiak, Lumba enggau Main, sereta Pemansang Orang Dagang bekaul enggau Para SUKMA 2024 ti diatur ba rumah iya di Jalan Bakti ditu, kemari.
Ngenang komiti khas ti ari baruh Perkara 15A nya, Fatimah madahka, komiti nya ketegal budi bicara tauka pengelandik ngaga pemutus KDN, ti ditumbuhka kenyau ari Datuk Seri Ahmad Zahid Hamidi nyadi menteri KDN sereta semina ungkup Sarawak.
“Siti pekara ke dipinta ari baruh Perkara 15A iya nya ungkup anak tauka nembiak kitai ti dijaga ba institusyen JKMS, ngambika sida ke nadai ditemu sapa bagi apai indai, ulih diperunding khas lalu ulih nyadi rayat menua tu.
“Laban enti sida ulih nyadi rayat menua tu, lebih mudah ngagai apai indai ke deka ngambi anak nya nyadi anak iru. Enti nadai peranak menua, udah tentu nya deka ngenanggul laban sida patut nganjung peminta nyadi rayat menua tu, enti dibanding nyema bisi diperunding khas ungkup ke dijaga instusyen JKMS lalu ulih nyadi rayat menua tu,” ku iya.
Nitihka Fatimah, dalam prosedur operasyen standard (SOP) ari baruh JKMS, iklan ngiga apai indai kebendar anak tauka nembiak mit ke dibuai nya bisi digaga ba semua surat kabar awakka apai inadai nya ulih datai betemu enggau pegawai JKMS sereta penerang mega deka dilalaika.
“Enti apai indai nya datai, tu udah tentu deka ngemudahka pengawa kitai ngatur anak tauka nembiak mit nya nyadi rayat menua, tauka ba surat beranak ulih diengkah rayat menua tu.
“Nyema apai indai kebendar orang Malaysia sereta ari Sarawak, maya kitai ngerejista laban indai iya rayat Malaysia orang Sarawak, anak nya deka nyadi rayat Malaysia.
“Iiklan diengkah sebulan dalam surat kabar, dikerapaka apai indai anak nya deka datai sereta kitai bejalaika proses nitihka pematut,” ku iya seraya madah naka ke udah nadai apai indai datai betemu enggau JKMS bekaul pekara nya.
Sama bisi dalam aum pengarang berita nya kemari, Sapit Menteri Pemansang Indu, Nembiak Mit enggau Pengelantang Komuniti Datuk Razi Sitam, sereta sida kebukai.