KMKK bisi kuasa ngeripot penyalah ADUN ti ngarika sitak sida, ku Abdullah
KUCHING: Tuai genturung pendiau enggau tuai raban bansa (KMKK) bekuasa penuh ngeripotka enggau lengkas enda ngira bagi salah pengawa ti dikereja Kaban Kunsil Nengeri (ADUN) ke ngarika sida, ku Datuk Abdullah Saidol.
Sapit Menteri ba Opis Premier Sarawak (Pekara Korporat, Pemadah enggau UKAS) nya minta kelebih agi di kandang menua pesisir ulih beratika nyema ADUN ba endur sida enda ngereja tanggung pengawa ti udah dipenggi.
“Sida (KMKK) tau madah ngagai Unit Integriti enggau Ombudsman Sarawak awakka mansik (sebarang bagi) pemutus, aksyen tauka ulah ADUN,” ku Abdullah.
Iya madahka pekara nya lebuh dirandau raban pengarang berita pengudah bejadi ‘Jelajah Penerangan dan Penjelasan Isu-isu Semasa’ diatur UKAS enggau Pustaka Negeri Sarawak ditu ensanus.
Abdullah bepenemu mensia mayuh mesti sedar ke hak sida maya ngeripot sebarang pekara ti enda manah dikereja orang ti gawa ba opis perintah nyengkaum ADUN.
“Taja pia, anang ngeripot tauka sebana ketegal pengasai ati, petenah sereta ke sebaka enggau nya. Tu ulih ngeruga pemanah nama individu ti ditagit.
“Enti deka ngeripot tauka sebana, tentuk fakta (dikenataika) betul sereta ukai asil pelaba tauka petenah ti nadai nyadi,” ku iya.
Nambah nya, iya madahka nengeri meri kelala undangundang ombudsman berindik ari 70 perattus ari RM12 bilion ti diungkupka dikena bejalaika pemansang fizikal enggau infrastruktur.
“Pemansang tu udah tentu deka nyengkaum mayuh ejensi, opis ti bejalaika enggau kontraktor.
“Nya alai, kena nyeliahka ari salag pengawa enggau nentuka ungkup belanja tu dikena manah kena bejalaika pemansang, aku ngasaika amat adil enggau pintar perintah meri kelala undang-undang
ombudsman ti nyaga integriti, nyata enggau akauntabiliti,” ku iya.
Iya mega ngarapka enggau penumbuh undangundang nya, nadai agi penyalah ngena kuasa enggau pengaruh(influence).
“Apin lama kitai bisi ninga pasal kes siku pegawai opis perintah disangka salah nguna duit opis sepenyampau RM10 ngagai 15 juta tang duit nya ti patut diagih ngagai rayat. Kitai enggai pekara ti baka tu nyadi.
“Kitai (mega) enda nyalahka mensia mayuh ti bisi anggap negatif ngagai kaban politik laban kitai nemu bisi sekeda pengari rayat ngembuan ulah ti enda manah.
“Tang, bisis mega pengari rayat lurus ati bejalaika kereja enggau manah nyadi mangsa ketegal bakih ke sama enggau kereja nadai ngembuan tanggung pengawa,” ku iya.
Hari bulan undang-undang ombudsman diteritka bedau uluh tetapka laban unit agi dalam proses netapka.
“Tang tu tetap nyengkaum enda ngira sapa ti ngenataika sebana. Komiti agi ulih ngaga sebana enggau Unit Integriti enggau Ombudsman Sarawa, nyengkaum pegawai ari SPRM ti gawa dia,” ku Abdullah.