‘Little Borneo Birdie’ udah besedia mantaika main asal ba WCOPA 2024
Duta Main Asal Nembiak Mit (Duta kebudayaan cilik) Sarawak, Dion Das Louis tauka dikelala agi enggau juluk nama ‘Little Borneo Birdie’ besedia terebai ke California, Amerika Syarikat lebuh manggai ujung bulan Jun taun tu.
Iya netara kaban tim menua ke Kejohanan Seni Persembahan Dunia Ke-27 (WCOPA 2024) di Long Beach, Califonia.
Nitihka apai iya, Louis Lansam, pekit nya diatur berengkah ari 1 nyentuk ngagai 5 Julai sereta pengawa nyuaka midul deka diatur sehari nangkan nya.
Pekara nya dipadahka Louis maya nyempulang Dion sereta indai iya Edina Lanying meri penemuai basa ngagai Sapit Premier Sarawak Datuk Amar Douglas Uggah Embas ba opis iya ditu, kemari.
Dion ulih enggau bepekit renggat dunya pengudah menang midul emas di pekit renggat kepenudi Kejohanan Seni Persembahan Malaysia ti diatur di Kulala Lumpur kena 27 Januari 2024.
Iya ti mai bendera Sarawak merindang ngena tanda kontemporari etnik ti mai watak tauka perangai siku anak burung ti lalu ajat iya dikelalau nyadi ‘Little Borneo Birdie’.
Nitihka Lousi, tanda asal Iban, iya nya Ngajat ke dipandangka anak iya nitih
sereta belalauka dua burung Borneo ti besai iya nya Ruai tauka burung Argus Malaya Besar enggau Kenyalang tauka Burung Enggang.
Tu diayanka nengah pekayan asal ke dikena iya ngena bulu burung.
Singkang tanda nya mega dikiograf nunda singkang (Burung) Kenyalang maya iya terebai nengah pun kayu ti tinggi enggau Ruai maya iya ngerembaika bulu iya ti manah ba lantai kamung ajuh di menua ulu nengeri Sarawak.
Ku Louis, anak iya besekula ba Primari Dua di Sekula Primari (SK) Green Road ditu, ti bisi penau asal ngajat.
“Aku melabaka iya ngaris
nya ari aki sepiak indai iya ti mega landik ngajat ari Nanga Entabai di Pakan di bagi menua Sarikei,” ku indai iya.
Louis enggau Edina deka nyempulang anak seduai iya ke Long Beach, Califonia ti masuk pekit nya.
Sida diatu benung nyikap diri belaban ba pekit nya sereta Dion udah tentu ngenegapka agi tanda iya.
Uggah maya nerima penemuai basa nya madah diri gaga ati ngagai Dion ti ulih masuk pekit nya ti betikas dunya.
“Kitai amat gaga laban anak ke agi biaka baka tu ari komuniti kitai ulih mujur nyentuk ke renggat dunya,” ku iya.