Penyerakup, integrasyen pugu penegap ekonomi, rama enggau politik: Chieng
SIBU: Penyerakup enggau integrasyen rayat nyadi pugu pemun kena nyapai penegap ekonomi, rama enggau politik, ku Kaban Kunsil Nengeri (ADUN) Bukit Assek Joseph Chieng.
Nitihka iya, penyerakup patut diterenak sereta dikemeran enggau dikemeratka kenyau ari mit awakka mengkang meruan.
“Kaul bekualiti ngemuntangka rayat ulih begulai sama kena ngenegapka agi pemaik enggau pengelantang rama dalam komuniti Sibu.
“Enti ulih meretika pangan diri sereta ulih begulai, nya udah tentu nyadi siti budaya lalu nya deka ngemuntangka kitai betapi isu enggau penguji rama,” ku iya.
Iya madahka pekara nya lebuh bejadi pengawa nutup Program Randau Solidariti Komuniti (RSK) Pelilih Menua Sibu 2024 ti diatur di Rumah Monica Jugah, Nanga Salim ditu, apin lama.
Nambah nya, Chieng madahka, perintah Sarawak diatu deka nentuka nadai individu ti tinggal ari segang pemansang di Sarawak.
Nya alai iya minta ra
yat seruran nempa penyerakup enggau solidariti kena ngangkatka pengelantang pendiau komuniti di Sibu enggau kelebih agi di Sarawak.
“Semina ngena tisih nya, ia mega ulih nentuka Sarawak deka terus ngerembai enggau
maju jemah ila.
“Tu deka ngenyakahka agi langgur enggau agenda perintah ti nuju enggau deka ngamatka Sarawak nyadi sebuah nengeri ti pemadu maju di Malaysia,” ku iya.
Nyerumba program nya diatur, mayuh ejensi enggau
opis perintah bisi nyendiaka kaunter kena nerangka fungsyen sida sereta meri servis ngagai komuniti.
Sama bisi datai ba program nya, Sekretari Eksekutif Majlis Pembangunan Sosial Sarawak Dr. Zufar Yadi Brendan Abdullah.