LPKP Sarawak, SBTCA betemu, berandauka rega tambang bas ekspres kategori servis ekonomi
Lembaga Pelesenan Kenderaan Perdagangan (LPKP) Sarawak deka betemu enggau Persatuan Syarikat Pengangkutan Bas Sarawak (SBTCA) Hari Satu minggu baru berandauka pasal rega tambang bas ekspres niki kategori servis ekonomi nyerumba Hari Raya Aidilfitri.
Chairman LPKP Sarawak Michael Kong Feng Nian madahka, kediatu isu nikika rega tambang bas ekspres bedau dikerandau taja pan Jemaah Menteri perintah besai udah ngemendar niki 10 peratus penyampau tambang ungkup servis ekonomi dalam timpuh 4 nyentuk ngagai 17 April ke deka datai.
“Naka kediatu, kami bedau berandauka pekara tu, nya alai aku enda ulih meri penerang silik.
“Taja pia, kami deka baum enggau SBTCA kena Hari Satu minggu baru ungkup sesi libat urus. Aku patut meda enggau mendingka penemu sida pasal pekara tu,” ku iya lebuh ditelefon, kemari.
Nambah nya Kong ma
dahka, pengudah betemu enggau berandau nya, deka mega diatur baum ninting bulan ti ditimpuhka kena 28 Mac.
“Kena 28 Mac tu ila, aku pechaya pekara tu deka dikerandau baru enggau silik agi begulai enggau LPKP enggau gerempung,” ku iya.
Kong nerangka lebuh ditanya sekalika Sarawak mega deka nikika rega tambang bas ekspres ungkup kategori servis ekonomi nyerumba Hari Raya Aidilfitri ila.
Dulu ari nya, Bernama ngeripotka Agensi Pengangkutan Awam Darat (APAD) nengah penerang berita kena Hari Tiga madahka Jemaah Menteri udah ngemendarka surcaj musim pengerami sepenyampau RM0.009 sekilometer (skm).
Nitihka APAD, surcaj ke dipejalaika nya deka nikika rega tambang bas ekspres kategori nya ngagai RM0.102 skm dibandingka enggau rega tambang biasa RM0.093 skm.
Ku ejensi nya, peminta Lesen Perubahan Sementara (LPS) udah dibuka ungkup servis bas ekspres nyerumba ngintu pengerami Hari Raya Aidilfitri kena 10 enggau 11 April tu.
Peminta LPS nya ulih dipinta semua operator bas ti patut berengkah 11 Mac nyentuk ngagai 2 April tu, sereta timpuh sah lisin ke semua peminta ke udah dikemendar iya nya ari 4 nyentuk ngagai 17 April.