Isu suntuk pengajar Jaku Iban isu signifikan
Isu nya enda ulih dianggap nadai reti tang patut diputarka ngena chara holistik, ku Gira
SIBU: Kaban Kunsil Nengeri (ADUN) Tamin Christopher Gira Sambang enda setuju enggau penemu ti madah isu suntuk pengajar Jaku Iban di Sarawak enda signifikan.
Dalam siti penerang kemari, iya bebendar madah isu nya enda ulih dianggap nadai reti tang patut diputarka ngena chara holistik.
Gira mega betanya nama kebuah Opis Menteri Pelajar Malaysia enggau Institut Pendidikan Guru Malaysia ngaga pemutus enda nyendiaka Program Ijazah Sarjana Muda Perguruan (PISMP) Bahasa Iban ba taun 2022 enggau 2023, kelebih agi ungkup ngajar di sekula primari di Sarawak.
Ku iya, data penyampau sekula primari (SK) ti bisi nyendiaka kelas Jaku Iban bisi 693 buah ari 1,264 buah sekula primari di Sarawak, lalu pemayuh kelas Jaku Iban di sekula primari iya nya 5,139 kelas.
“Pemayuh nembiak ti belajarka Jaku Iban di SK bisi 67,308 iku nembiak , sereta pengajar ke ngajar Jaku Iban di sekula primari iya nya bisi 2,662 iku.
“Isu ditu, ari 2,662 iku pengajar (Jaku Iban) tu, semina 352 iku pengajar ti udah dilatih enggau bisi opsyen ngajar Jaku Iban di sekula primari (iya nya pengajar ke ngambi Program PISMP tauka kus bukai ti bekaul).
“Tu reti ia bisi 2,310 iku pengajar ti ngajar Jaku Iban diatu ukai ari opsyen ngajar subjek nya,” ku iya.
Nambah nya, ku iya, data mega ngayanka semina 352 ari 2,662 pengajar Jaku Iban ti dilatih ngajar dibandingka enggau 2,310 iku pengajar ti nadai opsyen ngajar subjek nya.
Berindik ari nya, Gira madahka amat beguna ngisi penuduk puang pengajar Jaku Iban ngena individu ti dilatih, dikena nentuka kualiti ngajar ti manah agi
dalam subjek nya.
Kelimpah ari nya, Gira madah diri kala ngenang isu ti sebaka ba renggat sekula sekondari, iya nya semina 79 ari 502 pengajar ti ngajar Jaku Iban bisi opsyen dalam bidang nya, enggau bisi 423 iku pengajar Jaku Iban iya nya ukai dilatih.
Nya alai, iya minta atur pengawa ngambi pengajar ke Universiti Pendidikan Sultan Idris (UPSI) ulih diperundingka kena mutarka penanggul suntuk pengajar Jaku Iban.
Iya madahka, Jaku Iban iya nya aset budaya enggau jaku ti patut dikemeratka Opis Menteri Pelajar Malaysia.
“Jaku Iban ukai semina nyadi jaku etnik, tang nyadi jaku ti dikeempu rayat serata Malaysia,” ku iya.
Isu ditu, ari 2,662 iku pengajar (Jaku Iban) tu, semina 352 iku pengajar ti udah dilatih enggau bisi opsyen ngajar Jaku Iban di sekula primari (iya nya pengajar ke ngambi Program PISMP tauka kus bukai ti bekaul).