Komuniti Dayak diperansang belajarka main asal bansa awakka terus meruan
KUCHING: Raban bansa kelebih agi Dayak diperansang terus ransing ati ngerembai enggau ngangkatka main asal bansa awakka terus meruan sereta diangkunka nembiak rebak dudi.
Enggau juluk ngetan sereta ngangkatka main asal bansa, ASADIA terus ngemeran enggau ngerembaika main asal Dayak nengah pengawa ngatur kelas belajarka main asal.
Ketuai ASADIA, Mabong Unggang madahka dalam taun 2024 gerempung sida iya neruska pengawa ngatur kelas belajar ngajat, sape enggau belikan.
Nambah nya ASADIA mega terus nampung pengawa ngatur kelas belajar betabuh, bekuntau, bepantun kelimpah ari kelas belajarka leka main ngena chara online.
“Kami (ASADIA) ngarapka kitai bansa enda leju belajar sereta ngerembaika main asal kitai. Setipak enggau rambai jaku ASADIA ‘Main Asal Kitai, Tanggung Pengawa Kitai’.
“Nya kebuah kitai mesti deka ransing ati ngerembai sereta ngangkatka main asal kitai empu enggai ke lenyau sereta enda ditemu nembiak rebak baru enggau dudi,” ku iya madah ngagai Utusan Borneo.
Ngenang belikan, ku iya, mayuh kitai Iban enda ngelala nama utai ke dikumbai belikan.
Iya madahka, bansa kitai benasit laban bisi dokumentari pasal belikan ti digaga Tom Harrisson dalam taun 1958, sereta ditiki ke dalam YouTube ba taun 2014 dalam ‘The History of Borneo. The
Dayak’.
“Laban deka ngetan enggau ngangkatka belikan, ASADIA belajar ari YouTube lalu mansik chara ngaga belikan.
“Naka kediatu bisi 10 iku raban ASADIA udah nemu main nitihka ke tune belikan,” ku iya,
Kelimpah ari nya, iya madahka kelas belajar ajat Indu renggat ke-17 bisi 19 iku, sereta kelas belajar ajat lelaki renggat ke-17 bisi tujuh ilu, lalu semua sida nya agi biak.
Kelas belajar sape enggau belikan bisi dipasuk lima iku.
“Nama ti dikearapka ASADIA, enda ngira sapa ti udah belajar tauka bulih penemu enggau pengelandik ari ASADIA iya nya sida ulih ngatur kelas main asal awakka sama besaup ngangkat enggau ngerembaika main asal bansa kitai,” ku Mabong.