Projek Jematan Batang Lupar 2 dipelaba tembu Julai 2025
Projek ti begunaka ungkus belanja sepenyampau RM223.63 juta nya diatu udah manggai 42.65 peratus digaga
KUCHING: Pengawa ngaga projek Jematan Batang Lupar 2 diatu nitihka timpuh sereta dipelaba tembu dalam bulan Julai 2025.
Sapit Premier Sarawak, Datuk Amar Douglas Uggah Embas madahka, projek nya dipejalaika kenyau ari bulan Mac 2022 lalu diatu udah manggai 42.65 peratus digaga sereta 14 hari dulu ari ti ditimpuhka.
Iya madahka, projek ti begunaka ungkus belanja sepenyampau RM223.63 juta nya bisi menara kabel ti pemadu tinggi di Malaysia iya nya 145.5 meter.
“Tu ngemandakka timpuh pejalai entara Sri Aman enggau Betong ngagai 20 minit dibandingka sejam sebedau tu enti nengah Lebuhraya Pan Borneo penyauh 75 kilometer.
“Ungkus belanja iya nya sepenyampau RM223.6 juta enggau kami chukup gaga ati meda pemansang projek tu naka kediatu,” ku iya ti mega ngabas taba projek masang kabel keterubah.
Iya madahka pekara nya maya baum pengarang berita pengudah bejadi Pengerami Nasih Tanah Pakej B2 Fasa 1 Perambu Ngaga Jalai Ari Jalai Kejatau ke Jematan Batang Lupar 2, di Sri Aman, Hari Lima (kemari).
Uggah ti mega Menteri Infrastruktur enggau Pemansang Penyangkai Kapal madahka, enti jematan nya tembu, ia deka muka kandang endur ari jematan iya nya Sri Aman ke Betong enggau terus pansut ke Pan Borneo di Betong.
Ku iya, Jematan Batang Lupar 2 deka bisi digaga palan ngengkahka kerita enggau endur belelak kelimpah ari rekreasyen mit ungkup mensia mayuh ke datai kia.
Ku iya, nya nitihka peminta pengari rayat endur nya di bagi menua nya.
Ngenang projek ngaga jalai ari Jalai Kejatau ke
Jematan Batang Lupar 2, Uggah madahka, jalai ti berega RM154.8 juta nya deka ngelaungka kandang mengeri ke jematan.
“Kami melabaka deka
tembu lebuh manggai bulan Ogos 2026. Aku deka ke JKR (Opis Kereja raya) enggau kontraktor beratika hari bulan ti tumu agi awakka ulih sereta tembu
enggau Jematan Batang Lupar 2.
“Kami deka ke iya nya jematan udah tembu, lalu pia mega jalai tu,” ku iya.
Uggah madahka JKR deka matau tauka meresa pengawa ngaga dua bengkah projek iya nya jematan enggau jalai nya enggau silik dikena nentuka tembu baka ti ditimpuhka tauka dulu ari nya.
“Kami mega deka matau tauka meresa pengawa ngaga mayuh agi projek jalai raya ti udah dikemendarka Ejensi Pemansang Sri Aman tauka SADA.” ku iya.
Sama bisi datai, Sapit Menteri Pelajar, Inovasyen enggau Pemansang Penau sarawak ti mega Kaban Kunsil Nengeri (ADUN) Simanggang, Datuk Francis Harden Hollis; Kaban Parlimen Sri Aman, Dato’ Sri Doris Sophia Brodie; ADUN Lingga, Dayang Noorazah Awang Sohor; enggau Chairman Ejensi Pemansang Sri Aman (SADA), Dato Sri Rohani Abdul Karim enggau Direktor JKR Sarawak Datu Richard Tajan.
Tu ngemandakka timpuh pejalai entara Sri Aman enggau Betong ngagai 20 minit dibandingka sejam sebedau tu enti nengah Lebuhraya Pan Borneo penyauh 75 kilometer.
Datuk Amar Douglas Uggah Embas