Gerawat: Pemidang Datu Thomas Sarawak lenyau tukuh tebangkar
Sarawak lenyau siku tukuh tebangkar dalam bidang undang-undang enggau pemidang Datu Thomas Akin Jelimin.
Presiden Kot Apil Bumiputera nya midang Hari Dua apin lama maya umur 74 taun.
Sapit Menteri ba Opis Premier Sarawak (Pakar Pengereja Pengawa, Imigresyen enggau Patau Projek), Datuk Gerawat Gala madahka, niang mayuh jasa ngagai nengeri maya gawa enggau Opis Ottorney General Nengeri.
“Aku ngelala iya maya iya berengkah gawa enggau Opis Ottorney General Nengeri sereta iya siku orang ti chukup ngemeratka dedikasyen enggau profesional dalam pengawa.
“Udah nya iya dichiri nyadi Presiden Kot Apil
Bumiputera, iya nya pemadu tinggi ungkup Kot Bumiputera ti ngayanka pengarap enggau komitmen perintah sereta komuniti ngagai iya.
“Baka ti dipeda kita empu,
iya gawa ke perintah nyentuk ngagai maya hari iya midang agi dalam servis.
“Ba aku, sechara personal tu hari ti chukup sinu sereta aku ngarapka sida ke sebilik enggau niang liat ati betapi enggau penguji tu,” ku iya.
Iya madahka pekara nya lebuh dikerandau pengudah pengawa besembiang nguburka niang ti diatur ba Gereja St Joseph ditu, kemari.
Tembu pengawa besembiang nya, niang dibai sereta dikuburka ba Pendam Katolik Paradisum di Batu 13.
Dulu ari nya anak tuai niang, Winnie Endun bekunsi pengingat begulai enggau apai iya maya agi idup ti ngenyinuka ati orang mayuh ke datai ngemataka pejalai kepenudi orang dikesayau sida.
Niang ninggalka siku balu Datin Nancy Anyau enggau tiga iku anak, siku lelaki enggau dua iku indu.
Sama bisi datai Sapit Sekretari Perintah Sarawak (Operasyen) Datu Hii Chang Kee.