Undang-undang bekaul hak penguna patut dikemaru: Ong

Majlis Tindakan Pengguna Negara (MTPN) Pampang Sarawak ngansak perintah ngemaruka undangundang bekaul enggau hak penguna online.

Chairman iya, Wynson Ong madahka, dalam timpuh ti sama perintah patut nentuka undang-undang ke dipejalaika nya meri empas iya nya nyaga penguna ari emba dalam dunya siber.

Ong madahka, penyadi nipu nengah online (scam), nyaga data diri enggau akses ti sama rata ngagai servis digital iya nya entara isu ti begunaka pengibuh serius ari semua orang.

Kelimpah ari nya, kompeni patut bejalaika chara proaktif kena ngangkatka pengelikun online, nyendiaka penerang ti nyemetak enggau betul ngagai penguna enggau meri akses ti sebaka ngagai servis digital, ku iya.

“Siti ari penguji besai dalam era digital tu iya nya mereti tauka nemu enggau nyaga hak penguna dalam kelingi digital.

“Taja pia, penyedar enggau nyaga hak penguna ukai semina bepanggai ngagai aksyen perintah enggau kompeni, tang individu mega patut sama enggau aktif.

“Tiap iku bisi tanggung pengawa beguna dalam nyaga diri empu sereta nyukung inisiatif kena ngangkatka kualiti idup enggau sama sebaka dalam komuniti,” ku iya.

Iya madahka pekara nya nengah penerang berita nyerumba ngintu Hari Hak Penguna Sedunya, kemari.

Bekaul enggau pekara nya, MTPN Pampang Sarawak ku iya, bebendar deka nyadi ‘nyawa’ ngarika rayat Malaysia dalam nentuka hak penguna dijaga enggau didegika.

MTPN ku iya, tuju ia dikena ngangkatka penyedar enggau nyaga hak penguna nengah mayuh insiatif, nyengkaum kimpin penyedar, randau penguna, randau antiscam, kerejasama enggau perintah sereta swasta, enggau program kebukai.

“MTPN bisi mayuh penyambung komunikasyen nyengkaum nengah telefon, e-mel, pom online, tauka aplikasyen mobil.

“Isi pom sebana tauka nyendiaka penerang sebana kita nengah penyambung ti dipilih. Tuku ke meri penerang ti betul enggau silik pasal sebana kita, nyengkaum penerang tauka lumur telefon sereta penerang ti bekaul,” ku iya.

Nyerumba ngintu pengerami Hari Hak Penguna Sedunya, Ong mai penguna sama bejalaika komitmen nyadi penguna ti pintar, bisi tanggung pengawa enggau proaktif dalam negika hak diri empu.

Iya mega madahka nyadi siku penguna, semua orang bisi lapan hak penguna dalam pengidup tiap hari.

“Entara lapan hak tiap penguna iya nya hak bulih pugu guna, hak akses barang enggau servis pengelikun, hak akses ngagai penerang ti betul, hak ngaga pilih ti betul.

“Kelimpah ari nya, hak mantaika penemu, hak bulih pampas, hak idup dalam kandang endur ti beresi enggau bepengerai sereta hak bulih pelajar penguna,” ku iya.

Penguna ti bisi sebana tauka betapi penanggul ditipu tau telefon ngagai 017-710 9299 ngenataika sebana tauka betanya ti nadai bebayar.