Kontraktor dikeingat nerit, ngemeratka SOP taba projek
SOP tauka atur pengelikun dikeluarka JKR patut dititih enggau terit, pengelikun semua pekereja patut dikemerat
KUCHING: Semua kontraktor dikeingat patut nitihka prosedur operasyen standard (SOP) tauka atur pengelikun Opis Kereja Raya (JKR) enggau terit maya ba taba projek.
Sapit Premier Sarawak, Datuk Amar Douglas Uggah Embas madahka, sida patut ngemeratka pengelikun semua pekereja.
“Lebuh siku apai nurun gawa ngagai taba projek ngaga jalai tauka jematan, sida sebilik endang ngarapka iya pulai ke rumah enggau likun sereta tuchum.
“Amat beguna iya nya semua SOP enggau atur ti udah dikeluarka kitai nya dititihka belama. Nya kebuah aku ngansak sereta meransang semua kontraktor beratika pekara tu enggau serius,” ku iya.
Iya madahka pekara nya ba sebengkah pengerami
Sapit Premier Sarawak
nyerumba ngerami ‘safe manhour without any Lost Time Injury (LTJ)’ ungkup dua bengkah projek di Sri Aman, kemari.
Dua bengkah projek nya nyengkaum pengawa ngaga jalai raya ari Sebuyau ke Lingga sereta projek Jematan Lingga enggau jalai bukai ti bekaul.
Pengerami nya diatur begulai entara JKR enggau Sri Datai CHM JV Sendirian Berhad.
Uggah madahka, pekara nya patut dikemerat tauka dikeibuhka laban bisi enda kurang ari 100 taba ngaga projek perintah.
“Aku udah nyadi ketuai ba Opis Menteri Infrastruktur enggau Pemansang Penyangkai Kapal pengelama urung
tiga taun, sereta naka kediatu apin kala nerima sebarang ripot bekaul enggau penusah bebadi nyawa nyadi ba taba projek.
“Nya alai aku arapka JKR deka terus matau pengulih nitihka atur nya enggau penuh komitmen.
“Gaga taba projek ngaga jalai enggau jematan kitai endur ti likun ungkup semua orang,” ku iya.
Berebak enggau tu, Uggah mega minta JKR meda baru protokol enggau kereban pengelikun di semua terminal feri.
“Atur terit patut dipejalaika ngagai sida ke enggai ngena jaket pengelikun.
“Kitai enggai sebarang penusah nyadi baka ti kala nyadi beberapa taun ke udah nyadi baru, nya alai aku minta JKR meda baru aspek nerita undang-undang,” ku iya.
Sama bisi datai Kaban Kunsil Nengeri (ADUN) Simanggang Datuk Francis Harden Hollis, ADUN Bukit Begunan Datuk Mong Dagang, Chairman Ejensi Pemansang Sri Aman Datuk Seri Rohani Abdul Karim, ADUN Lingga Dayang Noorazah Awang Sohor, Sekretari Mendam MIPD Datu Chiew Chee Yau enggau Direktor JKR Datu Ir Richard Tajan.
“Amat beguna iya nya semua SOP enggau atur ti udah dikeluarka kitai nya dititihka belama. Nya kebuah aku ngansak sereta meransang semua kontraktor beratika pekara tu enggau ” serius. Datuk Amar Douglas Uggah Embas