Friday: Konsep betanam betupi moden lebih proaktif, nyungkakka agi penatai pemisi
SARATOK: Komuniti betanam betupi diperansang ngemeranka konsep betanam betupi moden laban nya chara ti lebih proaktif enggau ulih nyungkakka agi penatai pemisi.
Kaban Kunsil Nengeri (ADUN) Krian, Friday Belik madahka, konsep betanam betupi moden ulih nyungkak tauka nambahka mayuh agi asil penatai pemisi enggau ngemuntangka agi pengawa betanam betupi.
“Enti kitai deka bejalaika pengawa betanam betupi beskala lebih besai enggau chara domestik, konsep betanam betupi moden tu ulih ngurangka kitai ari bepanggai ngagai raban pengereja pengawa ti mayuh.
“Laban konsep betanam betupi moden tu mayuh agi bekena ke mesin sereta teknologi moden maya ngurus kereja, sereta tu mudah agi enti kitai nguasa bidang tu.
“Nya alai, perintah seruran meransang raban betanam betupi di nengeri tu ngambika ngemeran tauka nguna konsep betanam betupi moden laban tu ulih nyungkakka agi asil penatai pemisi enti diurus enggau lebih sistematik sereta diperambu manah,” ku iya.
Iya madahka pekara nya ba Pengerami Bejadi ‘Agriculture Community Outreach Programme (Agricop)’ ti diatur ba Rumah Kunjan, Bila Dua, Kabo, Hari Lima.
Program nya diatur Opis Betanam Betupi Sarawak sereta dipasuk sekeda ejensi perintah ti bukai.
Nitihka Friday, kena ngamatka pengingin ati enggau ngeranchakka agi aktiviti betanam betupi ba sitak nya, Ejensi Pemansang Bagi Menua Betong (BDDA) mega bisi nyendiaka ungkup belanja khas kena ngenegapka agi sektor betanam betupi ba kandang endur nya.
“Kena ngemajuka sektor betanam betupi ba sitak DUN Krian tu, BDDA udah ngungkupka ungkup belanja sepenyampau RM4 juta.
“Nya alai, ngagai komuniti betanam betupi ti bisi ati ngereja sektor tu ngena chara moden enggau skala besai, sida diperansang betemu enggau opis kami lalu ngerebut peluang tu kena ngemajuka diri.
“Pekara ti pemadu beguna ditu iya nya bebendar, bisi juluk ati, bisi pengandal ati, bisi taba enggau langgur nya mega patut bisi, kena nentuka pekara ti diperambu nyadi nyata enggau pemujur ulih diasaika,” ku Friday.
Nyerumba pengerami nya, Friday bisi ngungkupka Projek Kecil Luar Bandar (MRP) sepenyampau RM15,000.00 ngagai JKKK Rumah Kunjan enggau RM8,000.00 ungkup Biro Wanita Rumah Kunjan.