KPWKM: ‘Operasi Bersepadu’ nagang penatai peminta sedekah menua luar
KUCHING: Opis Menteri Pemansang Indu, Ruang Bilik enggau Komuniti (KPWKM) terus chakah bejalaika ‘operasi bersepadu’ kena nagang tauka nyekat penatai peminta sedekah menua luar di mengeri besai di menua tu.
Menteri iya, Dato Sri Nancy Shukri madahka isu peminta sedekah ari menua luar ukai pekara baru sereta aktviti neritka undang-undang terus chakah dipejalaika mayuh bengkah opis ti bekaul.
“Mayuh ke udah ditemu sereta kebendar bisi sindiket, nya alai tu ngujungka kitai enggai nyadi enda neritka agi undang-undang kitai begulai enggau Opis Pengintu Pengelantang Komuniti (JKM), opis kaunsil tauka majlis, polis, imigrasyen enggau autoriti lokal (PBT).
“Semua mesti bekerejasama kena nentuka penerit undang-undang nya mujur ukai semina JKM, nyema (peminta sedekah nya) ditemu ari menua luar, sida imigrasyen deka bejalaika atur ke patut,” ku iya.
Iya nerangka pekara nya ngagai raban pengarang berita
maya dirandau ba Program Ilya Ramadan enggau Sumbangan Ramadan Kawasan Parlimen Santubong di Surau Darul Hijrah, Darul Hana ditu, kemari.
Bejaku baru Nancy madahka, penatai peminta sedekah ari menua luar tu dipeda mayuh agi nyadi maya bulan Ramadan kelebih agi di Semenanjung Malaysia.
Pekara tu nyadi ku iya engka ketegal ulah rayat Malaysia ti gerah jari kelebih agi maya nyambut bulan Ramadan.
Iya ngelalau rayat Malaysia ngambika lebih bejimat maya meri sekedah.
Dulu ari nya, ba program nya Nancy ti mega Kaban Parlimen Santubong meri pemeri ngagai 432 penerima ti nyengkaum orang nyelai pendiau (OKU), indai tunggal, orang tuai enggau sida ti begunaka bantu ari 14 buah genturung pendiau dalam sitak Pantai Damai.
Pemeri nya diberi nengah Yayasan Kebajikan Negara ti dipegai Tuai Pemesai Eksekutif,
Nordina Haron.
Nancy berebak enggau tu ngarapka pemeri nya ulih ngelempungka tating belanja penerima maya nyambut bulan Ramadan tu.
Iya ngarapka program tu deka meri peransang ngagai ti bukai sama mantu meri di bulan Ramadan tu.
Sama bisi datai, ADUN Pantai Damai Datuk Dr Abdul Rahman Junaidi ti mega Sapit Menteri Utiliti enggau Telekomunikasyen (Utiliti) sereta ti bukai.