Anyi: Gerempung Tuai Raban Dayak dipinta terus chakah ngatur program
Raban Gerempung Tuai Raban Dayak tauka Persatuan Ketua Kaum Dayak dalam sitak Ngemah dipinta terus chakah ngatur program ti meri empas positif ngagai kandang endur sida.
Kaban Kunsil Nengeri (ADUN) Ngemah, Anyi Jana madahka, tuai raban komuniti patut suah betanya ngagai ejensi perintah sereta Pusat Khidmat pengari rayat awakka bulih penerang pemadu baru.
“Mayuh penerang pemadu baru kelebih agi pasal bantu ti bisi disediaka, projek ke ulih diberi enggau langgur pemansang ke patut ditemu peranak,” ku iya.
Iya madahka pekara nya maya bejaku ba pengerami
Pemesai Begulai enggau Rayat di Rumah Tadong
Tambi, Sungai Pedai ditu, apin lama.
Nitihka iya, tuai raban komiti patut nemu tanggung pengawa sida dalam administrasyen ba renggat genturung pendiau tauka rumah panjai.
Terang iya, adminstrasyen ti bejalai lanchar ba renggat genturung pendiau endang begunaka siku tuai ti regas sereta ulih ngatur adminstrasyen enggau berurun seraya bisi kaul manah enggau ejensi perintah kelebih agi Opis Pelilih Menua.
Berebak enggau tu, Anyi mega nerangka pasal program ti diatur Unit Pengelikun enggau Penerit UndangUndang Sarawak (UKPS) enggau Opis Pengerejista Bansa (JPN) di sitak DUN Ngemah.
“Program nya kena mutarka isu nadai dokumen pengelala ti sah, enggau aku ngarapka program UKPS enggau JPN tu meri penguntung ngagai peranak di Ngemah,” ku iya.
Nyerumba pengerami nya, Anyi ngemendarka geran MRP sepenyampau RM14,000 ngagai Komiti Pengelikun enggau Pemansang Genturung Pendiau (JKKK) Rumah Tadong enggau RM3,000 ungkup Biro Wanita Rumah Tadong awakka bisi dikena ngatur aktiviti ninting taun.
Sama bisi datai Pemanca Charlie Salang, Penghulu Lembat Atau, Penghulu Dunstan Mandau enggau temuai kebukai.