MOTS komited ngemansang, ngemoden sistem pengangkut sungai di Sarawak
Opis Menteri Pengangkut Sarawak (MOTS) komited ngemansang enggau ngemodenka sistem pengangkut sungai di nengeri tu.
Menteri iya Dato Sri Lee Kim Shin madahka, opis menteri iya deka ngaga sungai Sarawak nyadi sebagi ari sistem penyambung pengangkut enggau logistik ke guna komersial.
Nya alai, ku iya, Lembaga Sungai-Sungai Sarawak (LSS) patut bekerejasama enggau MOTS kena meransang pengawa bekenaka sungai nyadi sistem pengangkut kelebih agi maya mai barang besai ngambika ukai semina bepanggai ba jalai raya aja.
“Nyema mayuh kargo besai ulih diangkut nengah sungai, ari tu kitai ulih ngurangka pengerusak jalai raya kitai.
“Seraya mega, kitai ulih ngurangka penusah bebadi
enggau penyekut ba jalai raya,” ku iya dalam penerang kena Hari Lima.
Iya madahka pekara nya maya baum enggau Chairman
LSS Safiee Ahmad ba opis iya di Bangunan Baitulmakmur ditu, kena Hari Tiga apin lama.
Maya baum nya, Lee mega minta Safiee ngambika terus nempa kerejasama enggau raban pengatur LSS awakka ulih ngaduka manah agi struktur organisasyen nya.
Tu ngambika sida ulih kereja enggau bejalaika tanggung pengawa LSS sereta nyendiaka servis ti lebih lebih chakah enggau meri asil ti manah.
Dulu ari nya, Safiee meri penemuai basa ngagai Lee ti udah dichirika nyadi Chairman LSS ti baru berengkah 1 Januari 2024.
Tuju penemuai nya kena ngulihka sanding penemu pasal langgur MOTS dudi hari enggau kuing tuju LSS.
Sama bisi datai, Sapit Menteri MOTS (Sungai enggau Tasik) Dato Henry Harry Jinep; Sekretari Mendam MOTS Dato Ir. Alice Jawan Empaling enggau Kontroller LSS Lt Kol Ding Tiew Wong.