SKE 2.0 ngangkatka tikas penemu orang indu renggat baruh bekaul landskap politik nengeri
MIRI: Program ‘Sarawak Kita Empun 2.0’ (SKE 2.0) iya nya sebagi ari pengawa dalam madahka ngagai orang indu di renggat baruh bekaul enggau ubah sereta pemaru landskap politik diatu sereta mega enggau inisiatif perintah Gabungan Parti Sarawak (GPS).
Program tu inisiatif Majlis Tertinggi Wanita (MTW) Parti Pesaka Bumiputera Bersatu (PBB) nyadika pelasar dikena meri penerang ti beguna enggau engkeman ngagai rayat kelebih agi orang indu.
Pampang N.78 Mulu iya nya pampang ti ketiga ke ngaga program tu pengudah N.5 Demak Laun enggau N.25 Simunjan.
Sapit Menteri UndangUndang, MA63 enggau Kaul Nengeri-Perintah Besai Datuk Sharifah Hasidah Sayeed Aman Ghazali udah datai bejadi pengerami nutup program diatur MTW enggau PBB Mulu tu ba sebuah hotel ditu, lemai kilah ensanus.
Hasidah ti mega Chairman
Komiti Bejalaika Pengawa SKE 2.0 enggau Mandal Ketuai Tiga, Orang Indu PBB Sarawak.
Tiga topik ke dibantaika iya nya ‘Senario Politik dan Inisiatif Kerajaan GPS’ ari Tukang Wang PBB Sarawak ti mega Sekretari Politik Premier Sarawak Dayang Nurfizawati Abang Abdul Karim, topik ‘Strategi Pembangunan Pasca COVID-19 2030’ ari Sapit Ketuai PBB Sarawak Datin Sri Angelina Ujang enggau topik ‘Media Sosial’ ari Mandal Ketuai Dua Orang Indu PBB Sarawak Umang Nangku Jabu.
Nitih ku Hasidah, topik tu endang beguna dalam nyikap raban orang indu PBB di renggat pampang enggau ranting dikena nyikap diri tumu ke Aum Besai PBB Ke-16 taun nyin ila lalu pengudah nya Pengawa Bepilih Nengeri Ke-13 dalam taun 2026.
“Raban kitai kelebih agi orang indu di renggat baruh ti mega tulang belakang negika parti enggau politik bejalaika tenggungpengawa ke endang berat sereta signifikan lebuh ti bejalaika pengawa,” ku iya nerang.
Iya ngarapk semua pesereta deka diberi enggau penerang sereta penemu ti chukup engau tampak, engkeman sereta pemadu baru ngambika ulih dikerembai ngagai renggat ranting.
Program tu iya nya pengeransing MTW betemu enggau orang indu ba renggat pampang, ranting enggau renggat beruh.
Enggau tu, MTW ulih nemu orang indu di renggat baruh tu enggau semak agi lalu ninga penanggul sereta sebana lalu nyaut tanya bekaul enggau topik ti kurang ditemu sebedau tu.
Enggau tu, sebarang aksyen ulih digaga sebedau aum sereta pengawa bepilih ti deka datai.
Program SKE ti keterubah dimun enggau diatur kena taun 2020.
Pengudah Pengawa Bepilih Besai Ke-15, senario politik udah berubah ke alai perintah GPS nyereta program Perintah Penyerakup ba renggat perintah besai.
SKE 2.0 iya nya program timpuh panjai ke alai MTW PBB deka mansang diri empu ke tetiap pampang DUN ti udah berengkah ari Februari nyin tadi nyentukka ujung taun 2025.
Batang tuju program tu iya nya dikena madahka tunga kuing sereta pengawa ti pemadu baru perintah GPS nuju pengelantang, insklusif enggau pemeruan rampa menua Sarawak kelebih agi betapi enggau pandemik COVID-19 ke alai ekonomi global udah tekeruga.
Sama bisi datai iya nya Sapit Menteri ba Opis Premier Sarawak (Pengereja Pengawa, Imigresyen enggau Matau Projek) ti mega Kaban Kunsil Nengeri (ADUN) Miri Datuk Gerawat Gala enggau Ketuai Unit Pemadah Orang Indu PBB Sarawak ti mega Ketuai Orang Indu PBB Mulu Datin Esther Mujan Balan.