Fadillah deka betemu ketuai parti penyakal, ninga peminta sida ngagai perintah
KUCHING: Sapit Menteri Besai Dato Sri Fadillah Yusof deka ngatur program betemu enggau ketuai parti penyakal minggu nyin ila dikena ninga peminta sida ngagai perintah.
Nitih ku Fadillah, pengawa betemu tu patut nya diatur Hari Dua nyin tadi tang ditangguh ngagai siti haribulan ke bukai ti bedau ditentuka laban bisi pekara bukai.
“Patut nya Hari Dua nyin tadi aku betemu enggau Datuk Seri Takiyuddin Hassan, Datuk Seri Hamzah Zainudin enggau Datuk Seri Dr Ronald Kiandee tang sida minta tangguh laban
Datuk Takiyuddin bisi pekara bukai.
“Nya alai nyangka minggu ti deka datai (hari bulan bedau ditetapka), nganti sida,” ku iya lebuh ditemu pengarang berita pengudah bejadi Pengerami Ngagih Bubur Lambuk di Surau Al Hidayah Taman Sejoli ditu kemari.
Lebuh ditanya bekaul tuju program betemu tu ila, Fadillah madahka iya deka ninga nama kebendar nya peminta sida ngambika dibantai ngagai perintah.
“Menteri Besai udah meri tanggungpengawa ngambika sida betemu lalu madahka nama ti dipinta sida.
“Pengudah nya baru aku mantaika ngagai perintah ngambika ulih dikerandau. Pengudah nya baru mih kitai berunding,” ku iya.
Sebedau tu Kaban Parlimen Muar Syed Saddiq Syed Abdul Rahman madahka di Parlimen udah berapa kali betemu enggau Sapit Menteri Besai dikena ngerandauka bekaul enggau agih belanja ungkup sitak dipegai iya ke diatu bedau diterima.
Taja pia Fadillah madahka agih belanja ari perintah ungkup sitak Parlimen Muar udah diberi.
Semina agih belanja ungkup iya (Syed Saddiq) nyadi Kaban Parlimen Muar aja ke bedau diberi, ku Fadillah.
Bekaul industri nanam sayur ke dikuasa peranak menua luar, Fadillah madahka undang-undang agi ari baru bidang kuasa Opis Menteri Dalam Menua enggau Opis Menteri Pengereja Pengawa.
“Prosedur ke udah bisi agi dikena lalu dalam undangundang agi ari baruh bidang kuasa sida,” ku iya.
Dulu ari tu, Fadillah ke mega Kaban Parlimen Petra Jaya udah bejadi simbolik ngagihaka 500 bungkus bubur lambuk ngagai peranak di Taman Sejoli enggau kandang menua dia.
Pengerami ngagihka bubur lambuk tu iya nya diatur Surau Al Hidayah Taman Sejoli enggau kerejasama Komiti Pemansang enggau Pengelikun Genturung Pendiau (JKKK) Taman Sejoli, Taman Heritage, Taman Murni, Taman Long Seng, Taman Peaceful enggau Taman Muhibbah sereta PBB Ranting Taman Sejoli.
Sama bisi datai iya nya Kaban Kunsil Nengeri (ADUN) Tupong ti mega Ketuai Sekretari Politik Premier Sarawak Fazzrudin Abdul Rahman.