Pengawa nipu dalam ‘online’ baka ensera Taju Remaong: Uggah
KUCHING: Sapit Premier Sarawak Datuk Amar Douglas Uggah Embas nyemakaka pengawa nipu dalam ‘online’ baka ensera Iban ‘Taju Remaong’.
Iya madahka tu baka ensera nya laban ti madahka pengirau ati bekaul enggau penambah rayat di Sarawak ke udah kena tipu nengah chara online.
“Tu entara isu ti dibantaika aku lebuh ti betemu enggau Pesuruhjaya Polis Sarawak, Datuk Mancha Ata,” ku iya lebuh ti nerima penemuai meri basa ba opis iya di Wisma Bapa Malaysia ditu, kemari.
Ku iya madah, nitihka ensera Remaong tu lebuh ti ngiga jelu, iya ngumpan enggau buah tauka pemakai bukai dalam kampung.
“Sapa bagi ti ngumpul tauka makai nya, udah tentu deka pedis.
“Remaong deka datai ngagai sida, lalu pemati enda ulih diseliahka agi. Pengawa betelefon nipu nengahchara online tu megasama,” ku iya nyemetak.
Sida ngumpan orang enggau besemaya meri belanja tauka perais enggau duit ti mayuh, tang pengujung nya, sida empu deka lenyau semua utai, ku iya madah enggau silik.
Berindik ari tu, endang dilalau ngambika ulih nyeliah diri nyadi orang ti kena tipu, rayat enda patut jampat tepejuh runding enggau semaya ti deka meri mayuh duit ke digaga bala orang ke telefon ti enda dikelala.
Beserimbai enggau tu,
Uggah mega meri besai pengaga ati ngagai polis enggau komitmen, pemaik enggau pengeransing sida dalam nentuka Sarawak tu terus likun ungkup semua.
“Tanggungpengawa sida endang mayuh penguji berindik ari Sarawak tu besai nyengkaum garis entara menua darat enggau tasik ti panjai.
“Tang kita semua udah ngaga enggau pengabis manah,” ku iya.
Mancha mega ti disempulang
lima iku raban pemesai kanan iya.
Raban sida udah meri penerang ngagai Uggah bekaul enggau gaya pengelikun sereta kes penyalah ti pemadu baru di Sarawak.
Uggah mega udah nerima penemuai meri basa ari Direktor Opis Menteri Luar nengeri Wilayah Sarawak, Fenny Nuli ti baru udah dichiri.
Fenny ti penatai asal ari Sri Aman, suba iya nya siku Duta Besai Malaysia di Peru.