Nembiak ti ba institusyen JKM patut diperundingka status peranak menua
Sarawak minta diperundingka khas ungkup nembiak ari baruh jaga institusyen Opis Pengintu Pengelantang Pendiau Komuniti (JKM) ngambika diberi status peranak menua.
Menteri Pemansang Orang Indu, Nembiak Mit enggau Pengelantang Komuniti Dato Sri Fatimah Abdullah madahka meri status peranak menua tu endang beguna dalam nentuka pemujur jemah ila bala anak tu sereta ngemuntangka proses ngiru anak.
“Ari peneleba kitai udah ngayanka endang tusah ngagai pemesai enggau pengereja pengawa kami ba institusyen ngintu pengelantang pendiau tu nemu bagi apai indai kandung bala anak ti ditinggalka tu taja mayuh pengawa udah dipejalaika.
“Nya alai kitai nengah Komiti Khas Peranak Menua ari baruh Pekara 15A Kontitusyen Perintah Besai minta ngagai bala anak ari baruh jaga institusyen ngintu pengelantang pendiau tu kelebih agi kes muai nembiak mit ambika chunto patut diperundingka khas,” ku iya.
Iya madah munyi tu lebuh
ti ditemu pengarang berita dalam meri penemu bekaul ubah bekaul isu pernaak menua baka ti udah dipadahka Menteri Dalam Menua Datuk Seri Saifuddin Nasution.
Ku Fatimah enggau meri status peranak menua tu mega deka ngemuntangka
proses ngiru anak ari apai indai ungkup nembiak di institusyen ngintu pengelantang pendiau.
Laban ari sukut status peranak menua ku iya udah ditentuka lalu apai indai iru enda ibuh berundingka penanggul tu.
“Sida ti ngembuan niat ke manah deka nyaga anak tu lalu nentuka pemujur bala anak ke udah ditinggalka tauka dibuai tu.
“Nya alai, kitai minta diperundingka khas ngambika sida tu ulih diberi status peranak menua laban nyema enda penanggul tu deka ba apai indai iru,” ku iya seraya ti nambah bisi tujuh nembiak ari baruh jaga institusyen ngintu pengelantang pendiau ari baruh JKM Sarawak tu enda ngembuan status peranak menua lalu udah dikemendarka peminta nya.
Ku Fatimah nambah, iya deka meda ngambika baka nembiak mit ti ada di nengeri tu bulih akses ngagai pelajar.
Tang ungkup bala anak ke nadai status peranak menua, tu deka meri pemar ngagai sida bulih akses pelajar lalu apai indai deka mayar ungkus besekula enggau penyampau ungkus peranak menua luar.
Nya alai, ku iya, mayuh bala anak ti nadai status peranak menua enda besekula taja pelajar iya nya hak ungkup semua nembiak mit.