Sarawak udah besedia ngatur Lumba, Main Komanwel 2026
Sarawak udah besedia deka ngatur Lumba enggau Main Komanwel 2026 nyema menua tu udah mutuska deka nyadi palan endur ngatur lumpa enggau main tu.
Menteri Nembiak, Lumba enggau Main enggau Pemansang Orang Dagang Dato Sri Abdul Karim Rahman madahka, iya dekaka sekeda program lumba enggau main ti bisi dalam tu ila deka diatur di nengeri tu.
“Taja pia, pekara tu agi dalam pansik sekalika Malaysia deka nyadi palan endur ngatur Lumba enggau Main Komanwel tauka enda. Enti nanya aku empu aku meratika kitai tu ulih, lapa enda?
“Nyema Malaysia ngatur nya, aku deka meda bisi kategori lumba enggau main bisi diatur ba Sarawak mega laban kitai patut nya bisi bekunsika pengerami baka tu,” ku iya.
Iya madah munyi tu maya aum media ngemunka ‘What About Kuching (WAK) 2024 Call For Proposal’ ditu kena Hari Satu nyin tadi.
Minggu nyin kemari, Majlis Olimpik Malaysia (MOM) udah ngesahka Persekutuan SUkan Komanwel (CGF) udah nyendiaka peluang ngagai Malaysia nyadi palan endur ngatur Lumba enggau Main Komanwel 2026 dikena
nganti Victoria, Australia ke udah matak diri taun nyin kemari.
Menua tu matak diri laban ungkus pengawa ngatur ti nambah ari perambu tumu AUD2.6 bilion (urung RM8.09 bilion) ngagai AUD7 bilion (urung RM21.78 bilion).
Beserimbai enggau tu,
Abdul Karim madahka diri andal ati enggau lumba Petronas Le Tour de Langkawi (LTdL) 2024 deka diatur ba 11 nengeri nyengkaum di Sarawak ari 29 September nyentuk 6 Oktober.
“Opis Menteri Nembiak, Lumba enggau Main udah ngatur aum di Kuala Lumpur kena Hari Satu (18 Mac) lalu
dipadahka dua renggat lumba deka diatur di Sarawak.
“Tu ti endang patut. Kitai enda patut semina ngatur program besai di Semenanjung Malaysia aja lalu ngelengkaka Sarawak enggau Sabah.
“Sekalika program lumba enggau main tauka pengerami, semua tu patut dikunsika begulai,” ku iya.