Perintah Sarawak ngagihka RM160 juta ngagai NRDA dikena ngemanahka sekula repuk di Limbang
Perintah Sarawak udah ngagihka sepenyampau RM160 juta ari baruh Ejensi Pemansang Kandang Menua utara (NRDA) dikena ngangkatmanah enggau ngaga baru sekula repuk di Bagi Menua Limbang.
Sapit Premier Sarawak Datuk Amar Awang tengah Ali Hasan madah, perintah nengeri endang beratika enggau silik bekaul enggau isu sekula rapuk ti ditapi bala pengajar di Sarawak.
Iya ti mega Menteri Pengeraja Asal enggau Pemansang Mengeri sereta Menteri Dagang Antarabansa, Industri enggau Beranakka Puku Sarawak tu madah, perintah nengeri endang ibuhka sistem pelajar di Sarawak enggau nyendiaka agih belanja ke besai ungkup tuju tu.
“Laban tu nengah NRDA kitai udah mega ngagihka sepenyampau RM160 juta ungkup semua bagi menua Limbang lalu sebedau kitai bejalaika tu kitai udah mega berandau enggau sida ti bekaul Pemesai Pelajar, bala prinsipal sekula ungkup kitai ngatur makmal lalu sida mega udah ngerintaika projek ti patut dikemeratka.
“Ni bagi ti ulih kitai gaga nya ti digaga dulu, lalu kitai deka berandau bekaul enggau pekara tu begulai enggau Opis Pelajar ke alai ni bagi ti patut dikemeratka dulu,” ku iya lebuh ti ditemu pengarang berita maya ngelawa sekula di Sekula Primari (SK) Trusan enggau SK Lintang Lawas kena Hari Dua nyin tadi.
Ku iya nerang, perintah nengeri deka nentuka pengelantang, pengelikun enggau nyendiaka pengajar sereta raban pengereja pengawa ti bisi rampa bejalaika pengawa ke kondusif ungkup bala anak kitai belajar.
Ku iya, bisi mega sekula ke chukup repuk lalu patut diangkatmanah perintah nengeri tang kuasa bidang pelajar agi ari baruh pegai perintah besai.
Bejaku bekaul enggau SK Trusan Lawas, ku iya perintah nengeri deka mekuh dalam ngangkatmanah enggau ngaga baru perengkaguna sereta begunana sekula ke repuk nyengkaum begunan ti beringkat ngambika ulih nyeliahka dituntung penusah ampuh bah.
Ungkup SK Lintang Trusan, ku iya nambah, begunan buding diatu udah digaga dikena ngengkahka nembiak lelaki enggau orang indu ke diatu benung nganti deka dipasangka enggau kuasa elekterik sereta ai.