Seni ngaga sugu tinggi patut dipelajar, nyungkak penatai pemisi
BINTULU: Pengawa ngaga sugu tinggi ti mega iya nya kereban ngepan ke dikena ba pala orang indu raban bansa Iban tu ulih nyungkak penatai pemisi ngagai tetiap sida ti ngaga tu.
Menteri di Opis Premier Sarawak Datuk John Sikie Tayai madah, seni ngaga sugu tinggi tu majak nerima peminta ba sida ti ngerejapa asil pengelandik jari enggau kereban ngepan raban bansa Dayak kelebih agi Iban.
“Nyema udah landik, tetiap sida tu ulih ngasilka sugu tinggi dalam timpuh tiga hari enggau tujuh unit sugu tinggi tetiap bulan udah nya dijual enggau rega ti engkeman,” ku iya.
Iya madah munyi tu lebuh ti bejaku bejadika Kus Ngaga Sugu Tinggi ke diatur Mitz Agency enggau Opis Menteri Dagang Temuai, Industri Kreatif enggau Seni Pemerindang ditu.
Kus tiga hari tu berengkah 14 nyentuk 16 Mac nyin tadi udah disereta bisi 30 iku pesereta ke diau ba kandang menua Tatau.
Kaban Kunsil Nengeri (ADUN) Kakus tu mega madahka, tetiap pesereta ti ngambi bagi udah diberika penemu bekaul enggau pekara pemun dalam seni ngaga kereban ngepan ba pala orang indu tu nyengkaum proses nembuka nya nyentuk mujur ngasilka sugu ti dikinginka ati.
“Nama ti beguna iya nya sugu tinggi ke diasilka tu nitihka kualiti ke ditetapka baka sugu tinggi tradisional chulin ke diasilka ari pirak jeman dulu kelia.
“Taja pia, kemaya hari tu tu diasilka enggau aluminium ti jauh murah agi ari perak,” ku iya nerang.
Ku Sikie madah, seni ngaga sugu tinggi tu endang patut diteruska raban nembiak rebak baru laban tu iya nya seni ngaga kereban ngepan ke endang diguna dalam mayuh pengerami raban bansa Iban.
Sama bisi datai iya nya Pemesai Pelilih Menua Tatau Jabang Juntan enggau Ketuai Seksyen Seni, Main Asal enggau Pesaka Opis Menteri Dagang Temuai, Industri Kreatif enggau Seni Pemerindang Dr Elena Chai.