Ambi pulai baru hak autonomi pengerai, pelajar Sarawak
Sarawak begunaka hak autonomi tu dikena ngatur kededua bidang laban perintah besai enda nemu bagi ke diguna nengeri
SIBU: Sarawak patut ngambi pulai baru hak autonomi pengerai enggau pelajar dikena megai kediri empu pengawa ngatur kededua bidang tu di nengeri tu.
Penyanding Penemu Parti Sa’Ati Rayat Sarawak (SUPP) Pampang Dudong Datuk Dr Soon Shoon Teck madah, tu endang beguna laban perintah besai enda nemu bekaul enggau guna nengeri tu.
“Sida enda nemu nama ti diguna kitai ambika chunto begunaka lutur ba sebuah sepital tauka klinik.
“Pia mega dalam pekara pelajar, endang manah agi Sarawak ngembuan autonomi kediri laban semina kitai nyadi orang di kandang menua tu aja nemu nama ti diguna kitai,” ku iya lebuh ti bejaku ba pengerami ngintu hari pengada iya ke -81 ti diatur SUPP Pampang Dudong enggau Sibu Jaya, bedau lama ti udah.
Iya mega madahka iya nya pengeransing Premier Sarawak Datuk Patinggi Tan Sri Abang Johari Tun Openg enggau sapit iya Datuk Amar Sr Sim Kui Hian ti minta kededua autonomi tu iya nya pengawa ke patut disukung ungkup pemaik Sarawak.
Ku iya madah nyemetak, tu iya nya dikena nyadika Sarawak manah agi dalam kededua bidang tu ungkup nembiak rebak baru.
“Kitai ngarapka deka bulih hak autonomi kitai ngambika kitai ulih ngaga pemutus kediri laban semina kitai aja ke nemu nama ke diguna kitai di Sarawak,” ku iya nyemetak.
Bejaku bekaul enggau kaul iya dalam politik, Dr Soon madah, iya berengkah nyereta SUPP dalam taun 1962 lebuh ti beumur 19 taun.
Nitih ku iya, maya taun 1989 iya udah dichiri nyadi
kaban Opis Kaunsil Mengeri Sibu (MPS) lalu pengudah nya dalam taun 1990 iya dichalun
ngarika SUPP ba kerusi Kunsil Nengeri (DUN) Dudong ari niang Tan Sri Dr
Wong Soon Kai.
Maya Pengawa Bepilih Nengeri 1991, iya udah menang kerusi DUN Dudong ti keterubah iya ngaul diri dalam politik.
“Aku udah 62 taun dalam SUPP nyentukka diatu aku deka meri besai terima kasih ngagai kaban perti Iban ke udah meri sukung ngagai aku.
“Nyema nadai sukung ari kita semua, aku nyangka enda nyadi pengari rayat pengelama 20 taun di Dudong,” ku iya nambah.
Sama bisi datai iya nya Sekretari Politik Premier Sarawak William Anut, Chairman SUPP Pampang Dudong Wong Ching Yong, Chairman SUPP Pampang Sibu Jaya Datuk Matthew Chen, Chairman Unit Bumiputera SUPP Pampang Dudong Penghulu Paing Tawi enggau shirman pengatur Lee Hui Sing.
Sida enda nemu nama ti diguna kitai ambika chunto begunaka lutur ba sebuah sepital tauka klinik.
Datuk Dr Soon Choon Teck