MOT bebendar ngiga chara mutarka penanggul penyekut jalai alun ba kandang endur ti bisi sekula
Opis Menteri Perengka Pengangkut Sarawak (MOT) benung ngiga chara mutarka penanggul penyekut jalai alun di kandang endur ke bisi sekula di semua pasar besai enggau mengeri di nengeri tu.
Menteri MOT Dato Sri Lee Kim Shin madah, kebuah pia laban opis menteri iya meretika bekaul enggau ubah landskap pemansang di mengeri besai nyengkaum Sri Aman kelebih agi maya orang mayuh di jalai alun tauka ‘peak hour’ lebuh apai indai nganjung anak ke sekula lalu maya tengah hari maya ngambi anak pulai.
Nitih ku iya, gaya ti sama tu mega nyadi di mengeri besai baka Kuching, Miri, Bintulu enggau Sibu taja gaya diatu ti mayuh agi penguji deka diputarka perintah laban bisi mayuh faktor ke patut diperatika.
“Siti ari pekara ti dikemeratka iya nya kitai patut ngerundingka sereta sekula ti tebilang ke bisi di tengah mengeri.
“Kelimpah ari ngadaka Komiti Perengka Pegnangkut Mensia Mayuh enggau Komiti Ngatur Trafik ti betuaika Residen tetiap bagi menua ti megai pangku pengawa nyadi palan endur meri buah runding ngagai perintah Sarawak dikena ngangkatka perengkaguna perengka pengangkut enggau pengawa ngatur trafik di Sri Aman enggau mengeri bukai,” ku iya.
Iya madah munyi tu nengah teks jaku iya ti dibacha Sapit Menteri Pelajar, Inovasyen
enggau Pemansang Penau (MEITD) Datuk Francis Harden Hollis maya ti bejadi Program Perengka Pengangkut-Penyedar Ubah Ulah (T-ABC) Renggat Bagi Menua Sri Aman ba sebuah hotel ditu.
Ku iya, penambah 17 peratus kes bebadi jalai alun ungkup taun tu dibandingka enggau statistik kes bebadi jalai alun 2022 Renggat Bagi Menua Sri Aman tu iya nya kelai ti nyata guna chara komunikasyen ti engkeman enggau mesej kimpin entara MOT nengah advokasyen begulai enggau Opis Perengka Pengangkut Jalai Darat (JPJ) begulai enggau Polis Diraja Malaysia (PDRM) sereta komuniti di kandang menua nya.
“Kitai ngembuan penemu iya nya pemerat patut diberi ngagai ubah ulah enggau runding dalam penguna jalai alun lalu pia mega nambahka tikas penyedar sereta meretika
guna ngasika atur tauka undang-undang jalai alun.
“Kelimpah ari ti nguji mutarka penanggul tu nengah transformasyen sistem perengka pengangkut mensia mayuh enggau pemansang jalai alun mengeri,” ku iya nerang.
Berindik ari tu, ku iya, opis menteri iya udah ngangauka nembiak sekula sekondari, pengari gerempung apai indai enggau pengajar ari sekula ba kandang menua Sri Aman nyereta program T-ABC.
“Nengah keretas kereja ke deka dibantaika ba program T-ABC tu, kitai deka bekunsika penerang enggau bala pesereta, bekaul enggau baka ni kitai ulih bejalaika tanggungpengawa diri dalam mutarka penyekut jalai alun lekebih agi di kandang endur ti bisi sekula,” ku iya nambah.
Sama bisi datai ba pengerami tu iya nya Sapit Residen Bagi Menua Sri Aman Charlie
Keling, Ketuai Unit Kaul Korporat MOTS Elvis Didit, Pemesai Administrasyen Khas Ejensi Pemansang Sri Aman (SADA) Datu Indit Bangai, Ketuai Unit Pengelikun Perengka Pengangkut Jalai Alun enggau Komunikasyen Korporat Opis Perengka Pengangkut Jalai Darat Nengeri Sarawak Christopher Alex, Pemesai Pelilih Menua Sri Aman Sharif Bujang, Pemesai Pelilih Menua Lingga Frank Lani, Pemesai Pelilih Menua Pantu Langgong Wasam enggau bala bukai.
Program T-ABC tu iya nya ngembuan tuju ngubah ulah enggau runding penguna jalai alun, ti merati ngagai tiga perspektif iya nya pengelikun jalai alun ungkup deriba enggau pejalai kaki, tikas bejejimat enggau ngasika atur jalai alun sereta meransang ngena perengka pengangkut mensia mayuh kelimpah nyadi platform kimpin ngena perengka pengangkut mensia mayuh.