Raban badminton Dayak ditesau masuk Pekit Badminton Piala SDNU Sibu 2024, 19-21 April

Raban badminton Dayak di nengeri tu ditesau sama enggau masuk Pekit Badminton Piala SDNU Sibu 2024 ti deka diatur ba Dewan SMK Bukit Assek berengkah ari 19 nyentuk ngagai 21 April ke deka datai.

Tuai Biro Lumba enggau Main sereta Rekreasyen Kesatuan Kebangsaan Dayak Sarawak (SDNU) Sibu, Stanley Bayang madahka, pekit ti diatur SDNU Sibu nya ditetapka tebuka ngagai pemain Dayak enggau raban ti dikanggau aja.

“Badminton iya nya siti ari main ti dikerindu orang Dayak.

“Mayuh pemain Dayak ti bisi pengelandik kurang platform enggau peluang sida mantaika diri,” ku iya madah ngagai pengarang berita ditu, kemari.

Stanley madahka, tuju pekit nya diatur kena ngelala penau tauka pengelandik baru sereta nanggam kaul orang Dayak.

Kelimpah ari nya ku iya, pekit nya mega meri peluang ngagai orang Dayak ngasaika peneleba bepekit.

“Pekit tu dibagi ngagai tiga kategori beraban tiga begandin dua iya nya nyengkaum orang besai tuai beumur 34 taun ke baruh, senior (35 ngagai 44 taun) enggau veteran (45 taun ke atas),” ku iya.

Nitihka iya, tiap raban patut ngerijista enam ngagai lapan pemain (endur diau pemain patut di Sarawak sereta diau mendam di Sarawak maya pekit diatur) ti nitihka ketegori dipekitka enggau pemain semina dikemendar bemain sekali tiap kali belaban.

Iya madahka, pemain ti kala ngarika Sarawak tauka Malaysia (ari baruh SBA/BAM) baka SUKMA, Sukan Borneo enggau Tetutup Sarawak tauka bisi ID BAM/BWF tauka enda ngira nengeri di Malaysia enda diterima masuk pekit nya.

Terang iya, pemadu mayuh diterima masuk pekit nya semina 16 raban sereta nyema kurang ari 10 raban sida pengatur bisi hak ngubah perais mata duit.

“Format pekit raban deka diundi sechara rawak kena ngaga empat raban (A, B, C enggau D) tauka lebih nyema bisi lebih 16 raban,” ku iya.

Kelimpah ari nya, Stanley madahka raban ti nyadi champion pekit nya deka mai pulai perais mata duit sepenyampau RM1,500 sereta tropi enggau midul; lumur dua (RM900 enggau midul) enggau lumur tiga mai pulai perais mata duit RM400 sereta midul.

Yuran masuk pekit iya nya RM300 ke tiap raban, sereta yuran enggau pom patut diberi ngagai pengatur pemadu laun 14 April.

Bekaul enggau pom pekit enggau atur pekit tau ditanya ngagai Stanley ba lumur telefon 019-4538343.