Autoriti penyangkai kapal besai deka ditumbuhka
Autoriti nya deka nguruska semua penyangkai kapal ti dipegai perintah Sarawak ari baruh siti perabung nyengkaum Penyangkai Kapal Bintulu
KUCHING: Sarawak deka numbuhka siti autoriti penyangkai kapal besai tauka ‘Central Port Authority’ ti deka nguruska semua penyangkai kapal ti dipegai perintah nengeri ari baruh siti perabung nyengkaum Penyangkai Kapal Bintulu.
Premier Sarawak, Datuk Patinggi Tan Sri Abang Johari Tun Openg madahka nengah autoriti nya semua penyangkai kapal ke udah bisi di Sarawak baka Penyangkai Kapal Kuching, Penyangkai Kapal Miri, Penyangkai Kapal Tanjung Manis enggau Penyangkai Kapal Sibu (Rajang) ari baruh siti perabung.
“Kitai deka numbuhka siti penyangkai kapal besai tauka ‘Central Port Authority’ iya nya kitai deka nguruska semua penyangkai kapal ke bisi di Sarawak baka Penyangkai Kapal Kuching, Penyangkai Kapal Miri, Penyangkai Kapal Tanjung Manis enggau Penyangkai Kapal Sibu (Rajang).
“Tu deka diatur begulai enggau Penyangkai Kapal Bintulu ila (enti udah diambi lalu dikeempu) ari baruh siti perabung iya nya autoriti penyangkai kapal besai. Tu deka meri impak besai ngagai pemansang ekonomi ti benung bejalai di Sarawak sereta ekonomi Malaysia kelebih agi,” ku iya.
Iya madahka pekara nya maya baum pengarang berita pengudah pengawa nyain Sempekat Pemereti Ati (MoU) Nukar Status Penyangkai Kapal Bintulu ari Penyangkai Kapal Perintah Besai ngagai Penyangkai Kapal Nengeri ti digulu Menteri Pengangkut Malaysia, Anthony Loke di Kuala Lumpur, kemari.
Nitihka Abang Johari semua penyangkai kapai nya bisi tanggung pengawa besai setipak enggau polisi Strategi Pemansang Pengudah COVID-19 (PCDS) 2030 ti benung ngemansangka industri ulih dikena baru ti udah tentu begunaka penyangkai kapal strategik.
Ngenang pengawa nukar
Kitai deka numbuhka siti penyangkai kapal besai tauka ‘Central Port Authority’ iya nya kitai deka nguruska semua penyangkai kapal ke bisi di Sarawak baka Penyangkai Kapal Kuching, Penyangkai Kapal Miri, Penyangkai Kapal Tanjung Manis enggau Penyangkai Kapal Sibu (Rajang).
Datuk Patinggi Tan Sri Abang Johari Tun Openg
Premier Sarawak
status Penyangkai Kapal Bintulu ari perintah besai ngagai nengeri, iya ngarapka ulih diputar tauka ditembuka dalam taun tu.
Ku iya, nengah pengawa ngurus kediri empu Penyangkai Kapal Bintulu nya, kitai ulih ngatur tauka nyerariska puncha eksport nengeri kelebih agi hidrogen ti benung chakah dikemansang.
“Aku arap bendar diurus ari baruh perintah Sarawak empu, kitai ulih ngatur puncha eksport ke penyangkai kapal strategik sereta Bintulu bisi penyangkai kapal strategik.
“Aku ngasaika pemansang jemah ila deka bepanggai ba energi gadung enggau kitai fokus ngagai energi gadung, ti deka ngemendarka pemeranak puku produk gadung datai. Tu setipak enggau pemansang ti nyadi di serata dunya,” ku iya.
Nambah nya Abang Johari madahka, bekaul enggau arus trafik, entara Barat enggau Timur, Penyangkai Kapal Bintulu deka meri impak ukai semina ngagai Sarawak tang nyengkaum serata menua.
“Sehari tu aku beterima kasih ngagai perintah madani perintah besai enggau mega bala bakih aku ari Sarawak dalam pengerami MoU nukar status Penyangkai Kapal Bintulu ari penyangkai kapal perintah besai ngagai nengeri.
“Kitai ngarap sebedau abis taun tu, pekara tu ulih diputarka sereta Penyangkai Kapal Bintulu deka diurus perintah nengeri.
“Kitai bisi sekeda penyangkai kapal semina Penyangkai Kapal Bintulu aja ari baruh perintah besai ketegal sekeda faktor suba maya kitai ngemansangka Penyangkai Kapal Bintulu ti bisi kaul enggau Gas Asli Cecari (LNG) di Bintulu,” ku iya.
Kelimpah ari nya MoU Nukar Status Penyangkai Kapal Bintulu ari Penyangkai Kapal Perintah Besai ngagai Penyangkai Kapal Nengeri disain entara Opis Menteri Pengangkut Malaysia (MOT) enggau Opis Menteri Infrastruktur enggau Pemansang Penyangkai Kapal (MIPD) Sarawak.
MoU nya disain perintah besai ti diarika Menteri iya Anthony Loke sereta Sarawak diarika Datuk Amar Douglas Uggah Embas ti nyadi Menteri nyaga MIPD Sarawak.
Objektif MoU nya kena nyaga tauka ngemataka enggau ngelancharka proses nukar status Penyangkai Kapal Bintulu ari penyangkai kapal perintah besai ngagai penyangkai kapal perintah nengeri ngambika pengawa ngambi enggau ngempu nya ditetapka dalam taun 2024.
Entara chara ti udah dipejalaika dikena nentuka efektif enggau bejadi tiga komiti udah ditumbuhka, iya nya Komiti Khas, Komiti Kereja enggau Komiti Teknikal.
Sama datai ngemata pengawa nyain MoU nya Menteri Besai Datuk Seri Anwar Ibrahim enggau Sapit Menteri Besai Datuk Seri Fadlilah Yusof.