Rosey: Anang ninggalka anak dalam kerita maya injin kerita dipasang, pintu enggau jenila ditutup
Apai indai dikeingat ngambika seruran nyaga pengelantang anak sereta enda ngelakka sida ditinggal lama di dalam kerita sereta injin kerita dipasang, pintu enggau jenila kerita ditutup rapit semua.
Sapit Menteri Pemansang Indu, Nembiak Mit enggau Pengelantang Komuniti, Datuk Rosey Yunus madahka, apai indai dilalau ngambika mai anak nya sama pansut ari kerita sereta enda ninggal ke sida kelalu lama dalam kerita maya injin kerita dipasang.
“Kitai ninga mayuh kes nembiak mit ditinggalka dalam kerita baka nya sereta sekeda pekara ti nyadi diripotka ba pengujung iya enda manah.
“Kes ti kala nyadi sebedau tu patut nyadika teladan semua apai indai ngambika lebih bejaga,” ku iya bejaku enggau raban pengarang berita ba pengerami ‘ Juh Berambeh Sungkei Bersama Petronas 2024’ di sebuah hotel tebilang ditu ensanus.
Iya madahka pekara nya lebuh dipinta meri penerang bekaul pekara ti nyadi dikerembai di Facebook ensanus pasal dua iku nembiak mit lelaki ti tinduk dalam kerita bekunchi sereta injin kerita dipasang di Miri.
Bepelasarka video nya, mensia mayuh ti ibuh ke pekara ti nyadi nya nguji ngerak nembiak mit lelaki nya ngena chara nempap jenila enggau ngusak kerita.
Enda lama udah nya, siku ari nembiak lelaki nya tedani lalu muka pintu kerita nya.
Nitihka pemeri penerang, Dulu ari nya apai nembiak mit nya udah ngelawa pos opis ke semak sereta enda nemu pekara ti nyadi.
Rosey nerangka Menteri Pemansang Indu, Nembiak Mit enggau Pengelantang Komuniti Dato Sri Fatimah Abdullah enggau Menteri Pemansang Indu, Ruang Bilik enggau Komuniti Dato Sri Nancy Shukri udah suah amat ngingatka apai indai ngambika lebih bejimat tauka bejaga bekaul enggau pengelikun bala anak.
Taja pan kitai ngasaika ninggalka sida dalam kerita ti bisi airkond nya nyamai, ku iya, tang ia kebendar nya ngeruga pengelikun laban, laban nadai angin tama tauka pansut enti kelalu lama.
“Sida (apai indai dalam insiden ti nyadi di Miri) benasib manah laban enda ngeruga pengerai anak sida, tang pekara ti nyadi nya nya chukup ngeruga pengelikun sereta kitai gaga amat laban nadai penusah besai nyadi,” ku iya.
Ku iya, pekara nya ukai semina ngeruga nembiak mit, tang mega ulih ngeruga orang besai tuai.
“Tang ba orang besai tuai, seagi nembiak mit nya enda tinduk, ambis nadai sida ulih pansut ari kerita tauka muka jenila. Tang enti sida tinduk kelalu lama, nya mega ulih ngasuh bebadi nyawa sereta bisi kes baka tu udah nyadi bisi diripotka.
“Nya alai, semua orang, apai indai enggau orang besai tuai patut lebih bejaga ari pekara ti baka tu sereta ngarapka pekara tu enda nyadi baru lalu nyadika teladan enggau penyedar ngagai semua,” ku iya.