Shell LiveWIRE Malaysia diatur baru, mantu orang dagang ngerembaika idea dagang
KUCHING: Shell LiveWIRE Malaysia diatur baru taun tu sereta semua orang dagang ari Sabah, Sarawak enggau Semenanjung Malaysia dipinta nyadi sebagi ari inisiatif manah ti kena berubah ungkup orang dagang baru.
Ditumbuhka ba taun 2015, Shell LiveWIRE Malaysia ngaul orang dagang ti komited ngepun enggau ngerembaika idea dagang sida.
Nitihka penerang Shell kemari, program nya mai orang dagang ba siti siri kereja jurai tauka bengkel ti ulih mantu sida ngasil tauka nambahka penemu tauka idea dagang, nguji model dagang enggau nyikap sida nyadi pengempu dagang ti mujur.
Ku iya, ba pengujung program, sida deka ngambi bagi dalam bengkel ‘pitching’ sereta pekit ti enggau tuju ngelatih sida ngena pengelandik ti diguna kena ngerembaika dagang sida empu.
“Shell benung ngiga orang dagang ti bisi idea deka ngasilka pengidup dalam tiga aspek iya nya pemeruan rampa menua, impak rama enggau inovasyen dagang.
“Program Shell LiveWIRE Malaysia deka diatur di
Kuching, Kota Kinabalu enggau Lembah Klang,”
ku iya.
Lima pemenang ari tiap nengeri deka nerima geran pemungkal sepenyampau RM10,000.
Lima pemenang ari tiap nengeri udah nya deka belaban ba renggat nasional, sereta lima pemenang renggat nasional deka bisi peluang menang tambah RM30,000.
Kelimpah ari geran nya, pemenang mega diajar enggau diiring chara ngepunka dagang sida, ari fasilitator Shell LiveWIRE Malaysia dalam timpuh tiga taun ke deka datai enggau bisi peluang dipasuk ke dalam rentayan bekal sadung Shell enggau peluang kerejasama enggau perunchit Shell.
Di Sarawak, program Shell LiveWIRE bekerejasama enggau Tabung Ekonomi Gagasan Anak Sarawak (TEGAS), ti ukai semina nyediaka akses setaun di Perkampungan Digital TEGAS di Kuching enggau Hab Inovasi Digital TEGAS di Bintulu enggau Miri, sereta tiap pemenang mega diberi duit tambah RM5,000 agi ti dikena nambahka geran Shell LiveWIRE Sarawak.
Regista diatu ba website https://livewire.shell.com. my/.