Projek Jematan Bintulu-Jepak manggai 74.18 peratus naka Februari 2024
Opis Kereja Raya (JKR) Sarawak nengah video pandak dalam Facebook rasmi sida pasal pemansang pemadu baru pengawa ngaga Jematan Bintulu-Jepak di Kuala Kemena ti manggai 74.18 peratus naka Februari 2024, ti lalu ditagit tembu bulan Oktober taun ti sama.
Sekeda penguntung besai ari sukut sosioekonomi deka diasaika peranak luar enggau dalam Bintulu enti jematan nya tembu baka dalam video ti diayanka opis nya.
Jematan nya deka ngemandakka timpuh pejalai jalai tebing tasik ari Padang Bilun Bintulu ke mengeri Bintulu ari 22 kilometer (km) diatu nengah jalai ke udah bisi iya nya Jalai Bintulu-Sibu ngagai semina 6.4 km.
Palan Adminstrasyen Bagi Menua Bintulu mega chakah digaga semak enggau jematan nya ti deka mantu ngenyampatka agi pemansang kandang menua Jepak enggau deka meri servis ti efisyen agi ngagai 250,000 peranak Bintulu, penyungkak puku di Tanjung Kidurong sereta Taman Perindustrian Samalaju.
Jematan Bintulu-Jepak mega deka ngemandakka timpuh pejalai jalai tebing tasik Jepak ke Kuala Tatau, Serupai, Balingian nyentuk ngagai Bagi Menua Mukah, ti lalu mega nyendiaka pematak nyelai iya nya rampa menua tu manah ti dipeda ari menara jematan.
Tu laban jematan kabel tetap nya ba Kuala Kemena nya mega digaga lif vertikal ba menara jematan nuju ke mengeri Bintulu sereta deka dipasang lampu ias ti sebaka.
Jalai begembar dua lurung sepemanjai 4.2 km mega digaga kena nyambungka Padang Bilun Bintulu enggau Palan Administrasyen (IAC) Bintulu, sereta IAC nya ditimpuhka tembu ba bulan Oktober 2024 ti alai ngengkahka semua opis perintah di Bintulu.
Pekara nya dipadahka Sapit Menteri Infrastruktur enggau Pemansang Penyangkai Kapal Sarawak Datuk Ir Aidel Lariwoo maya ngabas seraya bejalaika pengawa ke taba Projek Pembinaan dan Penyiapan Jalan Pesisir Pantai Pakej 5, IAC dan Jambatan Bintulu-Jepak kena 19 Disember 2023.
“Kitai puas ati meda naka ti udah ditembuka diatu ti setipak enggau ti udah ditimpuhka taja pan bisi sekeda penanggul teknikal ditapi sebedau tu,” ku iya maya ngabas projek nya.
Terang iya, langgur perintah deka ngaga jalai begembar dua lurung kena nyambungka Padang Bilun Bintulu enggau IAC Bintulu sepemanjai 4.2 km nya mega deka ngemandakka timpuh pejalai sepenyampau dua pertiga entara dua alai nya.
Kereban ba jematan enggau palan adminstrasyen nyengkaum ngaga jalai tebing tasik nya dipelanja perintah Sarawak, lalu patut kitai berasai beterima kasih dalam napi peminta guna rayat, ukai semina kandang menua Bintulu, tang mega diasaika rayat diluar mengeru tu, ku iya.
Nya alai ku iya, Jematan Bintulu-Jepak nya deka mai impak ekonomi ngagai projek pemansang bukai, ngangkatka aktiviti sosioekonomi, dagang temuai enggau ti bukai ba kandang menua nya.
Pengawa ngaga jematan nya begunaka ungkus belanja sepenyampau RM466,679,497 iya nya perais ari perintah Sarawak ngagai peranak Bintulu ti dipadahka Kepala Menteri Datuk Patinggi Tan Sri Abang Johari Tun Openg (maya nya) diatu Premier Sarawak nyerumba ngintu Hari Sarawak di Bintulu kena 22 Julai 2019.
Penembu jematan nya ila deka mai mayuh pemansang enggau ekonomi ngagai kandang menua Jepak, kelebih agi mengeri Bintulu.