Jaga pemeresi kandang rumah ulih nagang alai nyamuk aedes betelu

SRI AMAN: Komuniti di Sri Aman ditangkan seruran nyaga pemeresi kandang rumah diri empu kena nagang alai nyamuk aedes betelu.

Pegawai Pelajar Pengerai Opis Pengerai Bagi Menua Sri Aman, Zaifa Johari madahka, pengawa nagang alai nyamuk aedes betelu begunaka kerejasama semua orang kelebih agi peranak di genturung pendiau enggau rumah panjai.

“Kitai minta semua orang nyengkaum peranak, individu, genturung pendiau sereta rumah panjai ngambika seruran beratika tauka fokus ngagai pekara pemeresi rumah diri empu kena nagang epidemik denggi berampit.

“Nyamuk aedes mudah amat betelu ba endur ti kamah baka ba takung ai, dalam tin puang tauka tayar jai enggau ti bukai,” ku iya.

Iya madahka pekara nya maya dirandau ba ‘Program Hebahan Denggi dan Memasang Banner serta Edaran Poster’ ba Opis

Perintah, Ejensi enggau Rumah Sembiang, apin lama.

Berindik ari pekara nya, ku iya, peranak genturung pendiau diperansang suah agi meresi kandang rumah diri empu kena nagang epidemik nya ari terus berampit.

“Beri awak diri pengelama ambis kurang 10 minit sehari meresi kandang luar rumah baka nebas rumput, muai tin puang enggau ti bukai dikena nagang epidemik tu ari terus berampit,” terang iya.

Nitihka Zaifa, apin lama udah kes penyakit denggi di Sri Aman bisi ngayanka penamabah, sereta berindik ari pekara nya Opis Menteri Pengerai Malaysia nengah Opis Pengerai Bagi Menua Sri Aman bejalaika inisiatif nambahka penyedar tauka pengibuh komuniti pasal epidemik nya nengah pengawa ngatur mayuh promosyen sereta nyadung risalah ngelingi Sri Aman.

“Inisiatif nya kena meri intervensyen pelajar tauka penerang pandak ngagai rumah panjai sereta genturung pendiau nyengkaum ngelekatka risalah bekaul epidemik nya ba premis dagang, opis perintah sereta ke rumah panjai enggau genturung pendiau ngelingi Sri Aman.

“Pengawa ke dipejalai tu ambis nadai meri pelajar sereta penyedar ngagai raban bansa pasal nyamuk aedes enggau penyakit denggi ke ulih ngeruga pengerai komuniti menua tu,” ku iya.

Kena nentuka pekara tu mujur, mega begunaka kerejasama ari Komiti Pemansang enggau Pengelikun Genturung Pendiau (JKKK) ba renggat genturung pendiau, rumah panjai enggau kandang genturung pendiau, ku iya.

“Nyema kandang endur kitai beresi, epidemik tauka igi penyakit tu enda ulih nyadi,” ku iya.

Sama bisi datai ba program nya, pengereja pengawa ari Opis Pelilih Menua Sri Aman sereta, Pegawai Tadbir, Mohd Hamizan Yahya.