Sarawak keran deka bisi Palan Ngubat Penyakit Riman
Riman penyakit kedua pemadu mayuh nyadi di Sarawak nangkan tungkul ati, ti begunaka ungkus belanja berubat mar
KUCHING: Sarawak terus keran deka bisi palan ngubat penyakit riman kediri empu dikena napi peminta guna pesakit riman di nengeri tu berindik ari ungkus belanja berubat riman ti mar.
Sapit Premier Sarawak, Datuk Amar Dr. Sim Kui Hian madahka, riman iya nya penyakit kedua pemadu mayuh nyadi di Sarawak nangkan tungkul ati.
“Nya kebuah aku enggau naka ulih deka nentuka kitai ngembuan Palan Ngubat Penyakit Riman Sarawak laban perengka guna orang ti sakit riman ba Sarawak enda kala dikenangi.
“Ngubat penyakit riman kelalu mar kelebih agi ngena imunoterapi tagit baru. Dipelabaka mayuh terapi genomik baru deka ditemu ngena pemintar artifisyel (AI) enggau tusun genetik dalam 10 taun ti deka datai,” ku iya nulis penerang nya ba Facebook iya kemari.
Menteri Pengerai Mensia Mayuh, Pengawa Berumah enggau Perintah Lokal nya madahka, sebansa terapi ubat ungkup riman tusu tikas empat (4) berega RM30,000 sebulan.
Terang iya, tebal agi orang engka betapi penanggul mayar RM30,000 kediri empu ba bulan keterubah.
“Taja pia diatu untung,
kitai bisi orang ti landik enggau pandai ngubat penyakit riman ba Sepital Besai Sarawak (HUS). Kitai semina patut bisi kereban,” ku iya.
Ngenang pejalai ngembuan palan ngubat penyakit riman, Dr. Sim madahka nya berengkah ari maya Datuk Seri Najib Tun Razak agi nyadi Menteri Besai sereta iya besetujuka palan nya ditumbuhka.
Tang udah nya perintah betukar sereta iya (Dr. Sim) sekali agi minta pekara nya ngagai Menteri Besai maya nya, Tan Sri Muhyiddin Yassin ti nimbal madah perintah nadai ungkup belanja.
“Nemu tauka sedar pekara nya Premier (Sarawak) kitai meri belanja ngena ungkup belanja Sarawak dulu. Taja pia perintah betukar baru ngagai iring Datuk Seri
Ismail Sabri nyadi Menteri Besai, iya nya Abang Jo nyukung penuh perintah ke dipegai iya.
“Menteri Besai Ismail Sabri madahka, iya deka mantaika pekara nya di Parlimen. Tang enda mukai-mukai perintah betukar baru,” ku iya.
Nyentuk ke Menteri Besai Datuk Seri Anwar Ibrahim ku Dr Sim, sekali agi Abang Johari enggau iya empu mai pekara nya ngagai menteri besai.
Ku iya pengudah betapi beberapa penguji, pengujung ia bisi dibantaika di Parlimen taun nyin kemari sereta Menteri Besai madah ngagai Opis Menteri Pengerai Malaysia, iya deka meda Palan Ngubat Penyakit Riman nya tembu dalam timpuh iya gawa (nyadi menteri besai).
Dulu ari nya, Dr. Sim madahka pekara nya lebuh ti ngenang ripot berita, Puteri Wales Kate Middleton Hari Lima, ti madah iya benung berubat kemoterapi ungkup penyakit riman.
Dalam pesan video ti dirikot BBC di Windsor, Kate madah iya didiagnos penyakit riman pengudah bebuntas abdomen ba bulan Januari, ripot Agensi Anadolu (AA).
“Kitai besampika Puteri Wales Kate Middleton jampat gerai sereta terus kering runding. Enda ngira ruang bilik sekalika diraja tauka orang biasa bisi hak bulih privasi,” ku iya.
Nya kebuah aku enggau naka ulih deka nentuka kitai ngembuan Palan Ngubat Penyakit Riman Sarawak laban perengka guna orang ti sakit riman ba Sarawak enda kala dikenangi.
Datuk Amar Dr. Sim Kui Hian