Sarawak komited nyapai inisiatif ekonomi hidrogen nyengkaum Projek H2biscus
Sarawak terus komited dalam pengawa nyapai inisiatif ekonomi hidrogen nyengkaum ngemansangka projek Hidrogen Hijau H2biscus Sarawak (Projek H2biscus) di Bintulu.
Sapit Menteri Pemeruan Rampa Menua, Datuk Dr Hazland Abang Hipni madahka, projek nya deka mantu dalam pemansang sisioekonomi nengeri.
“Projek H2biscus ngarika kerejasama entara perintah Sarawak nengah SEDC Energy Sdn Bhd enggau bakih kunsi ari Korea Selatan.
“Sida tu nyengkaum ari kompeni besai, iya nya SAMSUNG Engineering, LOTTE, enggau Korea National Oil Corporation (KNOC),” ku iya madahka pekara nya nengah penerang iya kemari.
Iya madahka pekara nya maya baum begulai enggau Tuai Direktor Biro Dasar Ekonomi Hidrogen ba Opis Menteri Dagang, Industri enggau Kuasa ari Korea Selatan Park Chan Ki di Houstan, Texas kena 19 Mac apin lama.
Aum nya fokus ngagai projek H2biscus ti bisi potensyel nyadi insiatif penengkebang ba skala global tauka serata dunya.
Kelimpah ari nya, aum nya ngayanka kerejasama enggau komitmen begulai nuju ngagai ngemajuka pengawa mutarka energi meruan enggau nempa penumbuh ekonomi.
Nya mega ngelai siti chara ti beguna ke mua dalam nyadika Sarawak nyadi pengemeran besai dalam landskap ekonomi hidrogen global tauka serata dunya.
Dulu ari nya, Dr Hadzlan nerima penemuai basa ari Park Chan Ki maya pengerami CERAWeek 2024 ti diatur di Texas.
Sama bisi datai, Pejabat Konsulat Agung Republik Korea di Houston Sinae Sung; Jang Jin Hwan ari KNOC enggau Park C.H. ngarika Samsung Engineering.
Raban pengari ari Sarawak iya nya Robert Hardin ari SEDC Energy Sdn Bhd enggau Dato Adrian Ching ari Brooke Dockyard and Engineering Works Corporation.