Projek RTP palan ngengkahka entukar di Rumah Stephen, Sg Gemuan tembu dulu ari timpuh ditetapka
Peranak ari Rumah Stephen, SUngai Gemuan Bintangor diatu berasai lantang ati laban pengawa ngaga palan endur ngengkahka entukar ba mua rumah panjai sida diatu udah tembu.
Kaban Kunsil Nengeri (ADUN) Meradong, DAtuk Ding Kuong Hiing madah, projek tu udah dipejalaika ari baru Program Transformasyen Menua Pesisir (RTP) DUN Meradong.
“Projek enggau ungkus RM50,000 lalu tu iya nya asil ari peminta bala peranak di rumah panjai tu.
“Bepelasarka timpuh, projek tu dipejalaika dalam timpuh tiga bulan, tang laban komitmen ti tegap ari raban kontraktor ke bekaul sereta mega ejensi ti bejalaika pengawa, projek tu mujur ditembuka tumu ari hari bulan tembu bajka ke udah ditetapka.
“Raban kitai mega chukup puas ati enggau kualiti bejalaika projek tu lalu ngarapka ulih meri pengelantang ngagai peranak di rumah panjai tu dalam sebarang aktiviti lalu mega palan endur ngengkahka entukar ti manah,” ku Ding.
Iya madah munyi tu ngagai media pengudah tembu ngelawa enggau matau pengawa ke taban projek ti udah tembu di Rumah Stephen, Sungai Gemuan BIntangor, kemari.
Sama bisi dalam program tu iya nya Penulung Injinir Perintah DIDI Bagi Menua Sarikei Faliana Mia Tibong enggau Pemancha Yii Hee Sieng.
Nitih ku Ding, projek tu iya nya sebagi ari pengeransing perintah Sarawak dalam ngangkatmanah perengkaguna peranak kelebih agi di kandang menua pesisir enggau rumah panjai.
Ku iya, projek tu mega iya nya kelai perintah bebendar dalam nangkup peminta rayat.
“Raban kitai endang bebendar dalam nangkup tetiap peminta rayat di kandang menua tu lalu mega nentuka pemansang terus diberi bepelasarka guna bala rayat.
“Kitai mega ngarapka rayat di renggat baruh deka meri sukung ngagai kami enggau mega ejensi perintah dalam nentuka tetiap projek pemansang ti dipejalaika peeintah di kandang menua kita dipejalaika enggau manah sereta lanchar lalu pengelantang diasai semua,” ku Ding.